ریاض (حمزہ عباس) — دارالحکومت ریاض میں جامع مسجد الراجحی کے زیرِ اہتمام تلاوتِ قرآنِ کریم کا ایک پُر وقار اور روح پرور پروگرام منعقد ہوا، جس میں مختلف حلقات و مدارس کے طلباء نے حصہ لیا۔ اس موقع پر حلقات تحفیظ القرآن الکریم رشید بن جبر، حی المربع ریاض کے طلباء نے بھی بھرپور شرکت کرتے ہوئے اپنی خوبصورت اور پُرسوز تلاوت سے حاضرین کے دل موہ لیے۔
پروگرام کے دوران طلباء کے درمیان قراءت کے مقابلے بھی منعقد کیے گئے، جن میں نمایاں کارکردگی دکھانے والے بچوں کو انعامات اور اسنادِ امتیاز سے نوازا گیا۔ شرکاء نے کم عمر حفاظ اور طلباء کی قراءت کو بھرپور سراہا اور ان کی محنت کو خراجِ تحسین پیش کیا۔
اس موقع پر قاری اسد اقبال، مدیرِ حلقات رشید بن جبر، نے اپنے خطاب میں کہا کہ "ایسے پروگرام نئی نسل میں قرآنِ کریم سے محبت، دلچسپی اور شوقِ تلاوت کو فروغ دیتے ہیں، جو ایک روشن مستقبل کی بنیاد ہے۔”
تقریب میں مولانا عبدالمالک مجاہد (نائب مشرفِ حلقات) سمیت دیگر اساتذہ کرام، والدین اور مقامی معززین نے شرکت کی اور طلباء کی حوصلہ افزائی فرمائی۔
پروگرام کا اختتام اجتماعی دعا اور دعائے خیر پر ہوا، جس میں ملک و امتِ مسلمہ کے لیے امن، ترقی اور استحکام کی دعا کی گئی
