الجبیل (سعودی عرب) — پاکستانی ایگزیکٹو فورم (PEF) کے زیر اہتمام صنعتی شہر الجبیل میں ایگزیکٹو بزنس اینڈ پروفیشنل سمٹ منعقد ہوا جس میں پاکستانی کاروباری حضرات کے ساتھ ساتھ سعودی اور غیر ملکی کاروباری شخصیات نے بھی بھرپور شرکت کی۔
شرکاء کا کہنا تھا کہ الجبیل دنیا کا سب سے بڑا انڈسٹریل سٹی ہے جہاں پاکستانی کاروباری افراد نئے بزنس آئیڈیاز اور تجارتی تعلقات کو فروغ دینے میں اہم کردار ادا کر سکتے ہیں۔
تقریب میں منطقہ شرقیہ کے مختلف شہروں سے تعلق رکھنے والے پاکستانی ایگزیکٹو اور پروفیشنلز نے شرکت کی۔ اس موقع پر سفارت خانہ پاکستان کے پریس قونصلر حسیب سلطان نے بطور مہمانِ خصوصی شرکت کی۔
پی ای ایف کے چیئرمین منیر احمد شاد اور راس تنورا چیپٹر کے صدر رانا کاشف رضا نے کہا کہ الجبیل میں آئل، گیس اور دیگر صنعتی سرگرمیوں سے پاکستانی پروفیشنلز بہتر انداز میں فائدہ اٹھا سکتے ہیں۔
انہوں نے کہا کہ اس سمٹ کا مقصد پاکستانیوں کے درمیان روابط کو مضبوط کرنا، تجربات کے تبادلے کو فروغ دینا اور ہم وطنوں کے لیے روزگار کے نئے مواقع پیدا کرنا ہے تاکہ پاکستانی معیشت پر مثبت اثرات مرتب ہوں۔
سمٹ کے دوران بچوں نے ملی نغموں پر خوبصورت ٹیبلو پیش کیے جبکہ تقریب کے آخر میں نمایاں کارکردگی دکھانے والے پی ای ایف ممبران کو اعزازی شیلڈز سے نوازا گیا۔
