ریاض (رپورٹ: رانا عظیم)
سعودی عرب کے دارالحکومت ریاض میں پانچویں یورپی فلم فیسٹیول کا شاندار افتتاح کر دیا گیا۔ افتتاحی تقریب میں سعودی عرب میں یورپی یونین کے سفیر کرسٹوف فارنوڈ (Christophe Farnaud) نے مختلف ممالک کے سفارتی نمائندوں، فلمی صنعت سے وابستہ شخصیات، ثقافتی حلقوں اور دیگر معزز مہمانوں کا استقبال کیا۔
یہ فلم فیسٹیول یورپی یونین کے وفد، یورپی رکن ممالک کے سفارت خانوں، عریبہ پکچرز، VOX Cinemas اور سعودی فلم کمیشن کے اشتراک سے منعقد کیا جا رہا ہے۔ ریاض کے معروف VOX Cinemas، سینچری کارنر میں 3 سے 10 نومبر تک جاری رہنے والے اس فیسٹیول میں 16 یورپی ممالک کی 16 منتخب اور عالمی سطح پر سراہی جانے والی فلمیں نمائش کے لیے پیش کی جا رہی ہیں۔
فیسٹیول کا بنیادی مقصد یورپی ثقافت، فنون اور سنیما کو سعودی ناظرین سے متعارف کرانے کے ساتھ ساتھ سعودی عرب اور یورپی ممالک کے درمیان ثقافتی روابط، باہمی مکالمے اور تخلیقی تعاون کو فروغ دینا ہے۔
افتتاحی تقریب سے خطاب کرتے ہوئے سعودی عرب میں یورپی یونین کے سفیر کرسٹوف فارنوڈ نے کہا کہ پانچویں ایڈیشن کے ساتھ یورپی فلم فیسٹیول ریاض کے ثقافتی منظرنامے کا ایک اہم حصہ بن چکا ہے۔ یہ فیسٹیول ہر سال یورپ کی بہترین کہانیاں سعودی ناظرین تک پہنچانے کے ساتھ فلم سازوں کے درمیان مکالمے، روابط اور تعاون کے نئے مواقع فراہم کرتا ہے۔ انہوں نے اس بات پر بھی روشنی ڈالی کہ سعودی عرب کی فلمی صنعت تیزی سے ترقی کر رہی ہے اور ایسے ثقافتی پروگرام بین الاقوامی تعاون کے لیے اہم کردار ادا کرتے ہیں۔
عریبہ پکچرز کے بانی عبدالالہ الاحمری نے پانچویں ایڈیشن کے انعقاد پر خوشی اور فخر کا اظہار کرتے ہوئے کہا کہ اس سال سعودی ناظرین کے لیے 16 ایسی بہترین یورپی فلمیں پیش کی جا رہی ہیں جنہیں کانز، وینس، برلن، سنڈینس اور آسکر جیسے عالمی فلمی پلیٹ فارمز پر پذیرائی حاصل ہوئی ہے۔ انہوں نے مزید بتایا کہ فلموں کی نمائش کے ساتھ ماسٹر کلاسز اور فلم سازوں کے ساتھ خصوصی پینل مباحثے بھی فیسٹیول کا حصہ ہوں گے۔
فیسٹیول میں بین الاقوامی سطح پر ایوارڈ یافتہ اور تنقیدی حلقوں میں سراہی جانے والی فلمیں خصوصی توجہ کا مرکز ہیں۔ ان میں آسکر ایوارڈ یافتہ ڈنمارک کی دستاویزی فلم Mr. Nobody Against Putin، معروف اطالوی ہدایت کار پاؤلو سورینٹینو کی فلم La Grazia شامل ہے، جس نے 2025 کے وینس فلم فیسٹیول کا افتتاح کیا اور اس کے مرکزی اداکار ٹونی سروِلو نے بہترین اداکار کا ایوارڈ حاصل کیا۔
دیگر نمایاں فلموں میں سنڈینس آڈینس ایوارڈ یافتہ قبرص کی فلم Hold Onto Me اور برلن انٹرنیشنل فلم فیسٹیول میں منتخب ہونے والی لٹویا کی فلم Maria’s Silence شامل ہیں، جو خاموش فلموں کی معروف اداکارہ ماریا لیکو کی حقیقی زندگی کی کہانی پر مبنی ہے۔
فلمی نمائشوں کے علاوہ فیسٹیول کے تحت تین خصوصی ضمنی پروگرام بھی منعقد کیے جا رہے ہیں، جن میں سعودی اور یورپی فلم سازوں کو ایک پلیٹ فارم پر جمع کیا جائے گا۔
ان پروگراموں کا مقصد تجربات کے تبادلے، فلم سازی کے جدید رجحانات سے آگاہی اور دونوں خطوں کے درمیان تخلیقی روابط کو مزید مضبوط بنانا ہے۔
ثقافتی اور فلمی حلقوں کے مطابق یورپی فلم فیسٹیول سعودی عرب اور یورپ کے درمیان ایک اہم ثقافتی پل کا کردار ادا کر رہا ہے۔مملکت میں فلمی صنعت کی تیزی سے ترقی کے تناظر میں ایسے بین الاقوامی پروگرام نہ صرف سعودی ناظرین کو عالمی سنیما سے متعارف کراتے ہیں بلکہ سعودی فلم سازوں کے لیے بھی عالمی تجربات، نئے خیالات اور بین الاقوامی تعاون کے دروازے کھولتے ہیں۔
