سعودی عرب کے دارالحکومت ریاض کے سویدی پارک میں ریاض سیزن کے تحت ثقافتی ویک کا شاندار آغاز ہو گیا۔ اس رنگا رنگ ایونٹ میں پاکستان سمیت دنیا کے 14 ممالک کی ثقافتوں کو نمایاں طور پر پیش کیا جا رہا ہے، جہاں روایتی موسیقی، رقص، دستکاری اور ذائقہ دار کھانوں نے پارک کے ماحول کو دلکش بنا دیا ہے۔
ریاض سیزن کے منتظمین نے ایک پریس کانفرنس میں بتایا کہ مختلف ممالک کے ثقافتی ویک منانے کا مقصد بین الاقوامی ہم آہنگی، رواداری اور ثقافتی تبادلے کو فروغ دینا ہے۔ ان کے مطابق، ریاض سیزن سعودی عرب میں مقیم غیر ملکیوں اور دنیا بھر سے آنے والے سیاحوں کے لیے ہر سال سویدی پارک میں ثقافتی سرگرمیوں کا اہتمام کرتا ہے، جس سے مختلف قومیتوں کے افراد ایک دوسرے کی ثقافتوں سے لطف اندوز ہوتے ہیں۔
افتتاحی تقریب میں مختلف ممالک کے فنکاروں نے اپنے روایتی رقص اور موسیقی کے ذریعے حاضرین سے بھرپور داد سمیٹی۔ سویدی پارک کو رنگ، روشنی اور ثقافتی سرگرمیوں کے حسین امتزاج سے سجایا گیا ہے، جو ایک عالمی ثقافتی میل جول کی علامت بن چکا ہے۔
پاکستانی ثقافتی ویک کے دوران پاکستان کے ثقافتی ورثے کو بھرپور انداز میں پیش کیا جا رہا ہے۔ پاکستانی فنکار لوک موسیقی، قوالی، دستکاری اور روایتی کھانوں کے ذریعے اپنی ثقافت کا منفرد رنگ پیش کر رہے ہیں۔ اس موقع پر ریاض میں مقیم پاکستانی کمیونٹی اور سعودی شہریوں کی بڑی تعداد نے شرکت کر کے ایونٹ میں گہری دلچسپی ظاہر کی۔
منتظمین کے مطابق، ثقافتی ویک کے دوران عوامی تفریح کے علاوہ فوڈ اسٹالز، بچوں کے لیے خصوصی سرگرمیوں اور لائیو پرفارمنسز کا بھی اہتمام کیا گیا ہے، تاکہ ہر عمر کے افراد اس عالمی ثقافتی میلے سے لطف اندوز ہو سکیں۔
ریاض سیزن کے دوران روزانہ ہزاروں افراد کی سویدی پارک میں آمد متوقع ہے، جو مختلف ممالک کے ثقافتی رنگوں سے بھرپور تفریح حاصل کریں گے۔
