ریاض: سعودی عرب کے دارالحکومت ریاض میں انٹرنیشنل لیڈرز فورم نے انٹرنیشنل کالج فار ٹورازم اینڈ ہاسپیٹیلٹی ریاض کے اشتراک سے نوجوانوں کے لیے ایک شاندار اور پُرمقصد ایونٹ کا انعقاد کیا۔
تقریب میں سفیرِ پاکستان احمد فاروق، انٹرنیشنل لیڈرز فورم کے بانی سید وقاص، حسن عمران، پروفیسر چین سمیت متعدد بین الاقوامی شخصیات نے شرکت کی۔
ایونٹ کا مقصد نوجوانوں میں علم و دانش، شعور، لیڈرشپ اور موثر کمیونیکیشن کی اہمیت کو اجاگر کرنا تھا۔ تقریب میں پاکستان، سعودی عرب، انڈونیشیا، چین، سری لنکا اور دیگر ممالک کے طلبا و طالبات نے بھرپور شرکت کی۔
اس موقع پر سفیرِ پاکستان احمد فاروق نے اپنے خطاب میں ایونٹ کے کامیاب انعقاد کو سراہتے ہوئے کہا کہ جدید دور میں کامیابی کے لیے مضبوط قیادت اور مؤثر ابلاغ ناگزیر ہیں۔
سید وقاص نے اپنے خطاب میں کہا کہ طلبا کے روشن مستقبل کی تعمیر میں اساتذہ کا کردار بنیادی حیثیت رکھتا ہے، کیونکہ وہی نوجوانوں کی صلاحیتوں کو نکھارنے اور ان کی رہنمائی میں مرکزی کردار ادا کرتے ہیں۔
ایونٹ کے دوران منعقدہ تقریری مقابلے میں شریک طلبا کی پُرجوش اور مدلل تقاریر نے حاضرین سے بھرپور داد سمیٹی۔
تقریب کے اختتام پر منتظمین کی جانب سے نمایاں کارکردگی دکھانے والے طلبا میں سرٹیفکیٹس تقسیم کیے گئے، جبکہ نوجوانوں کو علم، قیادت اور تخلیقی صلاحیتوں کی راہ میں مزید آگے بڑھنے کی ترغیب دی گئی۔
