ریاض — ورلڈ پوائنٹ میڈیا کے رانا عظیم نے پاکستان انٹرنیشنل ایئرلائنز (پی آئی اے) کے ریاض کے مینجر بلال احمد سے خصوصی ملاقات کی، جس میں انہوں نے سعودی عرب میں مقیم پاکستانی کمیونٹی کے لیے پی آئی اے کی خدمات اور آئندہ منصوبوں پر تفصیل سے گفتگو کی۔
بلال احمد صاحب نے بتایا کہ پی آئی اے اس ماہ کے آخر تک ریاض سے کراچی کی پروازیں دوبارہ شروع کر رہی ہے، جو تقریباً تین سال کے وقفے کے بعد ایک بڑی خوشخبری ہے۔
انہوں نے کہا: یہ فیصلہ پاکستانی کمیونٹی کی خواہش اور بھرپور مطالبے پر کیا گیا ہے، اور انشاءاللہ اس مہینے کے آخر تک ریاض سے کراچی کے لیے پروازوں کا باقاعدہ آغاز ہو جائے گا۔
انہوں نے مزید بتایا کہ اس وقت ریاض سے ہر ہفتے پی آئی اے کی تقریباً 10 پروازیں پاکستان کے مختلف شہروں — لاہور، اسلام آباد، سیالکوٹ، ملتان — کے لیے چلائی جا رہی ہیں، اور اب کراچی کے لیے پروازوں کا آغاز ہونے سے یہ سلسلہ مزید وسیع ہو جائے گا۔
“انشاءاللہ کراچی کے لیے فلائٹس کے آغاز سے ریاض اور پاکستان کے پانچ بڑے شہروں کے درمیان فضائی رابطے مزید مضبوط ہو جائیں گے۔
بلال احمد صاحب نے کہا کہ پی آئی اے سعودی عرب میں پاکستانیوں کے لیے کئی اہم خدمات انجام دے رہی ہے، جن میں سب سے نمایاں میّتوں کو مفت پاکستان بھیجنے کی سہولت ہے۔
انہوں نے کہا: “عام طور پر میّت کو پاکستان بھجوانے کے اخراجات تین سے چار ہزار ریال تک ہوتے ہیں، لیکن پی آئی اے یہ سہولت بالکل مفت فراہم کرتی ہے۔ ہم ہر سال لاکھوں ریال خرچ کرتے ہیں تاکہ ہماری کمیونٹی کو کسی قسم کی مالی یا انتظامی مشکلات کا سامنا نہ کرنا پڑے۔
انہوں نے مزید بتایا کہ 2023 میں پی آئی اے نے 625 میّتیں پاکستان بھجوائیں، 2024 میں 525، اور 2025 میں اب تک 325 میّتیں وطن واپس پہنچا چکی ہے۔ بلال احمد صاحب نے کہا، ہمیں اپنی قومی ایئرلائن پر فخر ہونا چاہیے، جو ہمیشہ اپنے ہم وطنوں کے ساتھ کھڑی رہتی ہے — چاہے کوئی ایمرجنسی ہو، میڈیکل ضرورت ہو یا کسی اور نوعیت کا مسئلہ، پی آئی اے ہمیشہ خدمت کے لیے تیار ہے۔
ان کا مزید کہنا تھا کہ پی آئی اے اپنے تمام مسافروں اور کمیونٹی کے افراد کا تہہِ دل سے شکریہ ادا کرتی ہے جنہوں نے ہمیشہ پی آئی اے پر اعتماد کیا۔
انہوں نے کہا، یہی اعتماد اور محبت ہماری سب سے بڑی طاقت ہے، اور ہم وعدہ کرتے ہیں کہ مستقبل میں بھی اپنی خدمات کو مزید بہتر بنائیں گے تاکہ پاکستانی کمیونٹی کو فخر ہو کہ پی آئی اے ان کی اپنی قومی ایئرلائن ہے۔
آخر میں پی آئی اے ریاض کے مینجر بلال احمد نے میڈیا کے نمائندوں کو ان کی خدمات اور تعاون کے اعتراف میں اعزازی شیلڈز سے نوازا۔
اس موقع پر انہوں نے کہا کہ یہ اعزاز اُن تمام افراد کے لیے ہے جو بیرونِ ملک پاکستانی کمیونٹی اور قومی اداروں کے درمیان مثبت تعلق کو مضبوط بنانے میں کردار ادا کر رہے ہیں۔
