عرکہ حق بنیان مرصوص کے حوالے سے سفارت خانہ پاکستان ریاض میں ایک پروقار تقریب کا انعقاد کیا گیا جس میں غیر ملکی سفیروں، عسکری حکام، سفارتی شخصیات اور پاکستانی کمیونٹی کے نمائندگان نے شرکت کی۔ تقریب میں اسلامی عسکری اتحاد کے کمانڈر جنرل (ر) راحیل شریف نے بطور مہمانِ خصوصی شرکت کی۔
تقریب کا آغاز سفیر پاکستان جناب احمد فاروق کے استقبالیہ خطاب سے ہوا، جس میں انہوں نے ملکی و غیر ملکی مہمانوں کو خوش آمدید کہا اور معرکہ حق بنیان مرصوص کی کامیابی کو پاکستان کی مسلح افواج کی پیشہ ورانہ مہارت، قومی یکجہتی اور دفاعی صلاحیتوں کا مظہر قرار دیا۔
اس موقع پر سفیر پاکستان احمد فاروق، سفارتی افسران اور دیگر مقررین نے اپنے خطابات میں پاکستان کی مسلح افواج کی جرات، قربانیوں اور پیشہ ورانہ صلاحیتوں کو زبردست خراجِ تحسین پیش کیا۔ مقررین نے کہا کہ پاکستان کی افواج نے ہر مشکل وقت میں مادرِ وطن کے دفاع کو یقینی بنایا اور قومی سلامتی کے تحفظ میں تاریخی کردار ادا کیا۔
مہمانِ خصوصی جنرل (ر) راحیل شریف نے اپنے خطاب میں پاکستان کی مسلح افواج کی پیشہ ورانہ تیاری، اتحاد اور قومی جذبے کو سراہتے ہوئے کہا کہ پاکستان ہمیشہ امن، استحکام اور علاقائی تعاون پر یقین رکھتا ہے۔
تقریب کے دوران معرکہ حق بنیان مرصوص سے متعلق خصوصی ڈاکیومنٹری بھی پیش کی گئی جس میں کامیابیوں، قومی عزم اور دفاعی تیاریوں کے مختلف پہلوؤں کو اجاگر کیا گیا۔
تقریب کے اختتام پر پاکستان کی سلامتی، ترقی، استحکام اور امت مسلمہ کے اتحاد کے لیے خصوصی دعا کی گئی۔
