سعودی عرب میں معروف پاکستانی فوڈ برانڈ "بنوں پلاؤ” کے کامیاب ایک سال مکمل ہونے پر ایک شاندار تقریب کا انعقاد کیا گیا۔ اس تقریب میں ٹک ٹاکرز، سوشل میڈیا انفلوئنسرز، میڈیا نمائندگان اور پاکستانی کمیونٹی سے تعلق رکھنے والے افراد نے بھرپور شرکت کی اور برانڈ کی کامیابی کو سراہا۔
تقریب کے دوران ہوٹل مینجمنٹ اور مالکان نے اپنی خوشی کا اظہار کرتے ہوئے کہا کہ الحمدللہ "بنوں پلاؤ” کو سعودی عرب میں ایک سال مکمل ہو گیا ہے۔ اس دوران پاکستانیوں، سعودی شہریوں اور دیگر قومیتوں کی جانب سے بے حد محبت اور پذیرائی حاصل ہوئی۔
انہوں نے کہا کہ معیار، ذائقہ اور بہترین خدمات ہی ان کی کامیابی کی اصل وجہ ہیں، جس پر وہ اپنے تمام صارفین کے شکر گزار ہیں۔ اس موقع پر ہوٹل کے مالک ہاشم کیانی نے کہا کہ "بنوں پلاؤ” کی سعودی عرب میں موجودگی نہایت کامیاب رہی ہے اور مستقبل میں مزید توسیع کا منصوبہ بھی زیر غور ہے۔
انہوں نے بتایا کہ ان شاءاللہ جلد ہی ریاض میں دوسری برانچ اور خبر میں تیسری برانچ کھولنے کا ارادہ ہے، جبکہ مستقبل میں پورے سعودی عرب میں مزید برانچز قائم کرنے کی کوشش کی جائے گی۔ تقریب میں شریک افراد نے "بنوں پلاؤ” کی کامیابی پر مبارکباد پیش کی اور نیک تمناؤں کا اظہار کرتے ہوئے کہا کہ اللہ تعالیٰ اس پاکستانی برانڈ کو مزید ترقی عطا فرمائے تاکہ یہ سعودی عرب میں پاکستانی کمیونٹی کا نام روشن کرتا رہے۔ تقریب خوشگوار ماحول میں اختتام پذیر ہوئی جہاں شرکاء نے برانڈ کی کامیابی کو سراہتے ہوئے مستقبل کے لیے نیک خواہشات کا اظہار کیا۔
