دمام – سعودی عرب
سعودی عرب کے علاقے منطقہ شرقیہ میں سفارت خانہ پاکستان اور شرقیہ چیمبر آف کامرس کے باہمی اشتراک سے آئی ٹی ورکشاپ اینڈ نیٹ ورکنگ سیشن کا انعقاد کیا گیا، جس میں پاکستانی اور سعودی آئی ٹی کمپنیوں، ماہرین اور کاروباری شخصیات کی بڑی تعداد نے شرکت کی۔
ورکشاپ میں سائبر سکیورٹی، مصنوعی ذہانت اور انفارمیشن ٹیکنالوجی کے مختلف شعبوں سے تعلق رکھنے والی 50 سے زائد پاکستانی اور سعودی کمپنیوں نے شرکت کی۔
اس موقع پر دونوں ممالک کی کمپنیوں کے درمیان دوطرفہ تعاون، کاروباری روابط اور ٹیکنالوجی کے شعبے میں مشترکہ مواقع کو فروغ دینے پر اتفاق کیا گیا۔
سفارت خانہ پاکستان کی منسٹر ٹریڈ اینڈ انویسٹمنٹ شگفتہ زرین نے اس موقع پر گفتگو کرتے ہوئے کہا کہ منطقہ شرقیہ سعودی عرب کا ایک اہم اقتصادی مرکز ہے جہاں سعودی آرامکو سمیت کئی بڑی کمپنیاں موجود ہیں۔ انہوں نے کہا کہ سفارت خانہ پاکستان کی کوشش ہے کہ زیادہ سے زیادہ پاکستانی آئی ٹی کمپنیوں کو سعودی مارکیٹ سے متعارف کروایا جائے، اور گزشتہ برسوں میں اس حوالے سے انتہائی مثبت نتائج سامنے آئے ہیں۔
سفارت خانہ پاکستان کے قونصلر اکنامک افیئرز راحیل طارق نے کہا کہ سعودی عرب انفارمیشن ٹیکنالوجی کے شعبے میں تیزی سے ترقی کر رہا ہے، جس کے باعث یہ پاکستانی آئی ٹی کمپنیوں کے لیے ایک بڑی اور اہم مارکیٹ بن چکا ہے۔ انہوں نے کہا کہ پاکستانی کمپنیاں یہاں کاروباری اور تجارتی روابط کو مزید مؤثر انداز میں آگے بڑھا سکتی ہیں۔
میڈیا سے گفتگو کرتے ہوئے منسٹر ٹریڈ اینڈ انویسٹمنٹ شگفتہ زرین، قونصلر اکنامک افیئرز راحیل طارق، اور پاکستانی بزنس مین و اویسس فیوژن بزنس سروسز کمپنی کے جنرل مینجر عدنان محمود نے پاکستان اور سعودی عرب کے درمیان آئی ٹی سیکٹر میں تعاون کو مزید فروغ دینے اور جدت پر مبنی شراکت داریوں کے فروغ کی اہمیت پر زور دیا۔
