ریاض: سعودی عرب کے دارالحکومت ریاض میں پاکستان انٹرنیشنل اسکول ریاض کے زیرِ اہتمام سالانہ مینا بازار کا انعقاد کیا گیا، جہاں طلبہ، والدین، اساتذہ، سفارتخانہ پاکستان کے افسران اور پاکستانی کمیونٹی کی بڑی تعداد نے شرکت کی۔
تقریب میں سعودی عرب میں پاکستان کے سفیر احمد فاروق کی اہلیہ محترمہ عائشہ احمد اور کمیونٹی ویلفیئر اتاشی ٹو محترمہ جنت حسین نیکوکارا نے خصوصی شرکت کی اور مختلف اسٹالز کا دورہ کیا۔ اس موقع پر سفارتخانہ پاکستان کے دیگر افسران اور ان کی فیملیز بھی موجود تھیں۔
ہر سال کی طرح اس سال بھی مینا بازار کو روایتی جوش و خروش کے ساتھ منایا گیا، جس میں مختلف ثقافتی، تفریحی اور فوڈ اسٹالز لگائے گئے۔ شرکاء نے خریداری، پاکستانی روایتی کھانوں اور مختلف سرگرمیوں سے بھرپور لطف اٹھایا جبکہ بچوں اور فیملیز نے اس ایونٹ کو خوب انجوائے کیا۔
پاکستان انٹرنیشنل اسکول ریاض کے پرنسپل راجہ محمد عرفان نے اس موقع پر کہا کہ مینا بازار کا مقصد کمیونٹی کو ایک خوشگوار اور مثبت ماحول فراہم کرنا ہے جہاں لوگ مل بیٹھ کر تفریح اور ثقافتی سرگرمیوں سے لطف اندوز ہو سکیں۔ انہوں نے کہا کہ ہر سال کی طرح اس مرتبہ بھی مینا بازار کو بھرپور انداز میں منایا جا رہا ہے اور کمیونٹی کی جانب سے اس کا شاندار ردعمل سامنے آیا ہے۔
تقریب میں مختلف اسٹالز، بچوں کی سرگرمیوں اور فیملی انٹرٹینمنٹ کا بھی خصوصی اہتمام کیا گیا، جسے شرکاء نے بے حد سراہا۔
