ریاض ( رانا عظیم) سعودی عرب کے دارالحکومت ریاض میں پاکستان کے سفیر احمد فاروق نے الدرعیہ کی تاریخ، ثقافت اور تاریخی ورثے کو اجاگر کرنے کے لیے اپنے تخلیق کردہ 18 فن پاروں کی منفرد نمائش پیش کی۔ الدرعیہ کو سعودی ریاست کا تاریخی مرکز اور جائے آغاز ہونے کی حیثیت حاصل ہے۔
تقریب میں شہزادہ سلطان بن سلمان بن عبدالعزیز آل سعود نے بطور مہمانِ خصوصی شرکت کی، جبکہ اسلامی فوجی انسدادِ دہشت گردی اتحاد (IMCTC) کے کمانڈر جنرل (ر) راحیل شریف بھی اس موقع پر موجود تھے۔ اس کے علاوہ مختلف ممالک کے سفیروں، سفارتی مشنز کے اعلیٰ حکام، فنونِ لطیفہ سے وابستہ شخصیات اور پاکستانی و سعودی کمیونٹی کے نمائندوں نے شرکت کی۔
سفیر احمد فاروق کے مطابق الدرعیہ کی تاریخ اور ثقافتی ورثے پر مبنی یہ فن پارے ایک طویل تخلیقی سفر کا نتیجہ ہیں۔ اس منصوبے کا آغاز 2023 میں ہوا اور تین سال کی محنت کے بعد اسے مکمل کیا گیا۔ سفارتی ذمہ داریوں کے ساتھ اس تخلیقی کام کو جاری رکھنا ان کے لیے ایک منفرد تجربہ رہا۔
ان فن پاروں میں الدرعیہ کے تاریخی مقامات، وادی حنیفہ اور بالخصوص الطریف تاریخی علاقے کو نمایاں کیا گیا ہے، جو یونیسکو کے عالمی ثقافتی ورثے کی فہرست میں شامل ہے۔ ان مقامات کی تاریخی اہمیت، فنِ تعمیر اور ثقافتی شناخت نے سفیر احمد فاروق کو اس تخلیقی منصوبے کی جانب راغب کیا۔
سفیر احمد فاروق نے بتایا کہ الدرعیہ کی تاریخ اور ورثے کے تحفظ کے لیے سعودی عرب کی کوششیں بھی ان کے لیے خاص طور پر متاثر کن رہیں۔ بالخصوص شاہ سلمان بن عبدالعزیز کے دورِ گورنری، جب وہ ریاض ریجن کے گورنر تھے، کے دوران تاریخی مقامات کے تحفظ، بحالی اور ترقی کے اقدامات نے انہیں اس موضوع پر کام کرنے کی ترغیب دی۔
مہمانِ خصوصی شہزادہ سلطان بن سلمان بن عبدالعزیز آل سعود نے اپنے خیالات کا اظہار کرتے ہوئے پاکستان اور سعودی عرب کے درمیان گہرے اور تاریخی تعلقات کو سراہا۔ انہوں نے کہا کہ دونوں برادر ممالک ہمیشہ ایک دوسرے کے ساتھ کھڑے رہے ہیں اور مستقبل میں بھی یہ تعلق مضبوطی سے قائم رہے گا۔
شہزادہ سلطان بن سلمان نے الدرعیہ کے ساتھ اپنی دیرینہ وابستگی کا ذکر کرتے ہوئے کہا کہ اس تاریخی علاقے کی ترقی، تحفظ اور عالمی سطح پر اس کی شناخت اجاگر کرنے کے عمل سے ان کا تعلق تقریباً چار دہائیوں پر محیط ہے۔ انہوں نے سفیر احمد فاروق کے ساتھ سعودی عرب کے ایک اور تاریخی علاقے کے دورے کی تجویز کا بھی ذکر کیا۔
تقریب میں اس امر کو بھی اجاگر کیا گیا کہ فن، ثقافت اور تاریخ صرف تخلیقی اظہار کے ذرائع ہی نہیں بلکہ مختلف قوموں کے درمیان قربت، باہمی احترام اور بہتر تفہیم پیدا کرنے میں بھی اہم کردار ادا کرتے ہیں۔ سفیر احمد فاروق کی یہ کاوش روایتی سفارتی سرگرمیوں سے آگے بڑھ کر دونوں ممالک کے ثقافتی اور تاریخی رشتوں کو اجاگر کرنے کی ایک خوبصورت مثال ہے۔
یہ نمائش سعودی عرب کے تاریخی ورثے کو خراجِ تحسین پیش کرنے کے ساتھ پاکستان اور سعودی عرب کے درمیان قائم دیرینہ برادرانہ تعلقات اور دوستی کی بھی عکاسی کرتی ہے۔
