ریاض: 2025 کا ریاض بین الاقوامی کتب میلہ، جو ادب اتھارٹی برائے اشاعت وترجمہ کے زیرِ اہتمام ’ریاض پڑھ رہا ہے‘ کے عنوان سے جاری ہے، اپنے دوسرے روز بھی علم و ادب کے متوالوں کے لیے کشش کا مرکز رہا۔
میلہ جامعہ امیرہ نوره میں منعقد ہو رہا ہے جہاں کتابوں کے شائقین، طلبہ، محققین اور اہلِ قلم بڑی تعداد میں شریک ہیں۔ انتظامیہ نے زائرین کے لیے مفت بس سروس فراہم کی ہے، جب کہ ریلوے اسٹیشن سے جامعہ تک ٹیکسی کرایہ اوسطاً 25 ریال ہے، جس کے بعد تقریباً 10 منٹ پیدل فاصلہ طے کرنا ہوتا ہے۔
میلے میں 25 سے زیادہ ممالک کے 2 ہزار سے زائد اشاعتی ادارے، ایجنسیاں اور ثقافتی تنظیمیں شریک ہیں، اور اس کے دوران 200 سے زیادہ فکری و ثقافتی سرگرمیاں ترتیب دی گئی ہیں جن میں مذاکرے، مکالماتی نشستیں، محاضرات، مشاعرے اور ورکشاپس شامل ہیں۔
کتب میلہ روزانہ صبح 11 بجے سے نصف شب تک عوام کے لیے کھلا رہتا ہے، جبکہ جمعہ کو دوپہر 2 بجے سے رات 12 بجے تک کھلا ہوتا ہے۔
یہ میلہ فکری و ادبی تبادلے کا ایک نمایاں پلیٹ فارم بن چکا ہے، جو مملکت سمیت دنیا بھر کے ادیبوں، مفکرین اور ناشرین کو ایک جگہ جمع کر رہا ہے۔
