ریاض: معروف کاروباری اور سیاسی شخصیت جناب عدنان اقبال بٹ کی جانب سے پاکستانی سفارتخانے کے سبکدوش ہونے والے قونصلر افسر جناب توقیف خاور کے اعزاز میں ایک پُروقار الوداعی تقریب کا اہتمام کیا گیا۔
تقریب میں پاکستانی کمیونٹی کی ممتاز شخصیات، سفارتکاروں، کاروباری رہنماؤں اور مختلف شعبہ ہائے زندگی سے تعلق رکھنے والے معزز افراد نے شرکت کی۔ شرکاء نے جناب توقیف خاور کی خدمات اور سعودی عرب میں ان کی مخلصانہ کاوشوں کو سراہا۔
اپنے خطاب میں جناب توقیف خاور نے پاکستانی کمیونٹی اور سعودی حکام کا شکریہ ادا کیا جنہوں نے ان کی مدتِ تعیناتی کے دوران بھرپور تعاون فراہم کیا۔ انہوں نے کہا کہ پاکستان اور سعودی عرب کے تعلقات تاریخی، دینی، ثقافتی اور اقتصادی بنیادوں پر قائم ہیں، اور یہ رشتہ باہمی احترام، بھائی چارے اور مشترکہ مفادات پر مبنی ہے۔
انہوں نے مزید کہا کہ اپنے دورِ ملازمت کے دوران سفارتخانے اور قونصلیٹ نے پاکستانی شہریوں کی سہولت، قونصلر خدمات میں بہتری، اور دوطرفہ تعاون خصوصاً تجارت، محنت کشوں اور سرمایہ کاری کے فروغ کے لیے مسلسل کوششیں کیں۔ ان کا کہنا تھا کہ پاکستان اور سعودی عرب کے تعلقات مزید مضبوط ہوں گے اور دونوں ممالک کی ترقی و خوشحالی میں اضافہ ہوگا۔
جناب عدنان اقبال بٹ نے جناب توقیف خاور کی پیشہ ورانہ صلاحیتوں، دیانتداری اور کمیونٹی کی خدمت کے جذبے کو خراجِ تحسین پیش کیا اور کہا کہ ان کی خدمات ہمیشہ یاد رکھی جائیں گی۔
تقریب کا اختتام نیک خواہشات اور مستقبل کے لیے دعا کے ساتھ ہوا، جس کے بعد شرکاء کے اعزاز میں عشائیہ پیش کیا گیا۔
