الریاض — سفارت خانہ پاکستان الریاض میں کشمیر کے حوالے سے یومِ سیاہ کی ایک پُر وقار تقریب منعقد کی گئی، جس میں سفیرِ پاکستان احمد فاروق کے ہمراہ سعودی عرب میں مقیم پاکستانی اور کشمیری کمیونٹی کے اراکین کی بڑی تعداد نے شرکت کی۔
تقریب کا آغاز تلاوتِ قرآنِ مجید سے ہوا، جس کے بعد کشمیری عوام سے اظہارِ یکجہتی اور بھارتی مظالم کے خلاف قراردادیں پیش کی گئیں۔ اس موقع پر صدرِ پاکستان آصف علی زرداری، وزیراعظم محمد شہباز شریف، اور نائب وزیراعظم و وزیرِ خارجہ اسحاق ڈار کے پیغامات پڑھ کر سنائے گئے۔
ان پیغامات میں مقبوضہ جموں و کشمیر کے عوام کی جدوجہدِ آزادی کو خراجِ تحسین پیش کیا گیا اور عالمی برادری سے مسئلہ کشمیر کے منصفانہ حل کے لیے مؤثر کردار ادا کرنے کی اپیل کی گئی۔
اپنے خطاب میں سفیرِ پاکستان احمد فاروق نے کہا کہ “کشمیر پاکستان کی شہ رگ ہے، اور پاکستانی قوم اپنے کشمیری بھائیوں کے ساتھ بھرپور یکجہتی کے ساتھ کھڑی ہے۔
انہوں نے مزید کہا کہ پاکستان ہر بین الاقوامی فورم پر کشمیری عوام کے حقِ خودارادیت کی حمایت جاری رکھے گا۔
تقریب کے اختتام پر مقبوضہ کشمیر کے شہداء کے ایصالِ ثواب کے لیے دعا کی گئی اور اس عزم کا اعادہ کیا گیا کہ پاکستان کشمیری عوام کی سیاسی، اخلاقی اور سفارتی حمایت جاری رکھے گا۔
