ریاض — ڈپٹی وزیراعظم اسحاق ڈار نے کہا ہے کہ پاکستان اور سعودی عرب کے تعلقات دہائیوں پر محیط ہیں، جو باہمی اعتماد، بھائی چارے اور تعاون کی بنیاد پر ہر گزرتے دن کے ساتھ مزید مضبوط اور مستحکم ہو رہے ہیں۔
انہوں نے کہا کہ دونوں ممالک اب ایک نئے دور کے تعلقات میں داخل ہو چکے ہیں، جہاں اقتصادی، دفاعی، اور سماجی روابط مزید وسعت اختیار کر رہے ہیں۔ اسحاق ڈار نے پاک سعودی دفاعی معاہدے کو دونوں برادر ممالک کے درمیان گہری اور پائیدار دوستی کی علامت قرار دیا۔
انہوں نے کہا: “ہمیں اس بات پر فخر ہے کہ ہم حرمین شریفین کے محافظ اور خدمت گزار ہیں۔ سعودی عرب کے ساتھ ہمارا رشتہ عقیدت، محبت اور باہمی اعتماد پر قائم ہے۔”
ڈپٹی وزیراعظم اسحاق ڈار اپنے سرکاری دورۂ سعودی عرب کے دوران ریاض میں سفارت خانۂ پاکستان پہنچے، جہاں پاکستانی سفیر احمد فاروق نے ان کا پرتپاک استقبال کیا۔ اس موقع پر سعودی عرب میں پاکستان کے سفیر نواف المالکی بھی موجود تھے۔
اسحاق ڈار نے اپ گریڈ شدہ قونصلر ہال اور پاسپورٹ سیکشن کا افتتاح کیا اور پاکستانی کمیونٹی کے لیے فراہم کی جانے والی سہولیات کا جائزہ لیا۔
کمیونٹی اراکین سے خطاب کرتے ہوئے انہوں نے کہا کہ بیرونِ ملک مقیم پاکستانی نہ صرف معیشت بلکہ ملک کی ترقی میں ریڑھ کی ہڈی کی حیثیت رکھتے ہیں۔ “ہم اپنے لاکھوں محنت کشوں کو خراجِ تحسین پیش کرتے ہیں جو اپنی دیانت، محنت اور لگن سے زرمبادلہ بھیج کر ملک و قوم کی خدمت کر رہے ہیں۔”
انہوں نے کہا کہ پاکستان ترقی اور خوشحالی کی نئی راہوں پر گامزن ہے، اور حکومت عوامی فلاح و بہبود کے لیے پُرعزم ہے۔
