ریاض (رانا عظیم) پاکستان کے معروف دیسی مٹھائی اور بیکری برانڈ سوغات سویٹس اینڈ بیکرز نے سعودی عرب میں اپنے ذائقوں کا باقاعدہ آغاز کر دیا ہے۔ دارالحکومت ریاض میں سوغات کی پہلی برانچ کے افتتاح کے ساتھ ہی پاکستانی مٹھائیاں سعودی شہریوں اور دیگر غیر ملکی صارفین کی خصوصی توجہ حاصل کر رہی ہیں۔
سوغات سویٹس اینڈ بیکرز پاکستان میں خالص دیسی مٹھائیوں اور معیاری بیکری آئٹمز کی بدولت ایک منفرد پہچان رکھتا ہے۔ ملکی سطح پر کامیابی کے بعد اب سوغات نے بین الاقوامی منڈی میں قدم رکھتے ہوئے سعودی عرب میں اپنے کاروبار کا آغاز کیا ہے۔
ریاض میں سوغات سویٹس اینڈ بیکرز کی برانچ کا افتتاح سعودی عرب میں تعینات پاکستانی ٹریڈ اینڈ انویسٹمنٹ منسٹر ڈاکٹر شگفتہ زرین نے کیا۔ اس موقع پر انہوں نے کہا کہ سعودی عرب میں پاکستانی مٹھائیوں کے ذائقے کو بے حد پسند کیا جاتا ہے اور اب ان کا یہاں دستیاب ہونا خوش آئند امر ہے۔
ڈاکٹر شگفتہ زرین نے مزید کہا کہ یہ پاکستان کے لیے باعثِ فخر ہے کہ ملکی برانڈز عالمی سطح پر اپنی شناخت بنا رہے ہیں۔ ان کے مطابق نہ صرف سعودی شہری بلکہ مختلف ممالک سے تعلق رکھنے والے افراد بھی پاکستانی دیسی مٹھائیوں سے لطف اندوز ہو رہے ہیں۔
ریاض میں قائم اس نئی برانچ میں روایتی پاکستانی مٹھائیاں، دیسی گھی میں تیار کردہ مختلف اقسام کے حلوے، کیکس اور دیگر سوئٹ آئٹمز دستیاب ہیں، جو صارفین کو خالص پاکستانی ذائقے کی یاد دلاتے ہیں۔
سوغات کی انتظامیہ کے مطابق مستقبل میں سعودی عرب کے دیگر شہروں میں بھی مزید برانچز قائم کرنے کا منصوبہ ہے، تاکہ پاکستانی ذائقوں کو زیادہ سے زیادہ لوگوں تک پہنچایا جا سکے۔
