سعودی عرب کے دارالحکومت ریاض میں ہیومن ریسورس اینڈ مین پاور ایکسپو کا شاندار آغاز ہو گیا ہے، جس میں پاکستان کے سرکاری و نجی اداروں نے بھرپور شرکت کی۔
ایکسپو میں اوورسیز ایمپلائمنٹ کارپوریشن (OEC)، وزیراعلیٰ ہنرمند پنجاب پروگرام اور پہلی مرتبہ بلوچستان ٹیکنیکل اینڈ ووکیشنل ایجوکیشن اینڈ کوالٹی اتھارٹی (B-TEVTA) کی جانب سے اسٹالز لگائے گئے۔
افتتاحی تقریب میں پاکستان کے سفیر احمد فاروق اور ایگزیکٹو ڈائریکٹر اوورسیز ایمپلائمنٹ کارپوریشن محمد عامر جان نے شرکت کی اور ایکسپو کا باضابطہ افتتاح کیا۔
اس موقع پر خطاب کرتے ہوئے دونوں معزز مہمانوں نے کہا کہ سعودی عرب اور پاکستان کے تعلقات مضبوط اور دیرینہ ہیں، اور ہماری کوشش ہے کہ پاکستان سے زیادہ سے زیادہ ہنرمند افراد کو سعودی عرب میں روزگار کے مواقع فراہم کیے جائیں تاکہ دونوں ممالک کے درمیان معاشی و افرادی قوت کے تعلقات مزید فروغ پائیں۔
ایکسپو میں انسانی وسائل، افرادی قوت اور روزگار کے فروغ سے متعلق متعدد بین الاقوامی کمپنیوں نے بھی حصہ لیا، جبکہ پاکستانی اداروں کے اسٹالز کو زبردست پذیرائی حاصل ہوئی۔
