ریاض: اوورسیز پاکستانی فاؤنڈیشن (او پی ایف) کے مینجنگ ڈائریکٹر محمد افضال بھٹی نے کہا ہے کہ جن پاکستانیوں کے ویزے پروٹیکٹر سسٹم کے تحت مکمل ہوچکے ہیں، انہیں پاکستان کے کسی بھی ہوائی اڈے سے آف لوڈ نہیں کیا جائے گا۔ انہوں نے کہا کہ او پی ایف اوورسیز پاکستانیوں کے حقوق کے تحفظ اور ان کی فلاح و بہبود کے لیے مکمل طور پر پُرعزم ہے۔
ریاض میں منعقدہ ایک تقریب سے خطاب کرتے ہوئے محمد افضال بھٹی نے کہا کہ وزیراعظم پاکستان محمد شہباز شریف اوورسیز پاکستانیوں کی خدمات کو قدر کی نگاہ سے دیکھتے ہیں اور ملکی معیشت میں ان کے کردار کو تسلیم کرتے ہیں۔ اسی سوچ کے تحت حکومت نے اوورسیز پاکستانیوں کے حقوق کے تحفظ کے لیے خصوصی عدالتیں قائم کی ہیں۔
انہوں نے مزید بتایا کہ مشرقِ وسطیٰ اور دیگر ممالک جانے والے افراد کے لیے مہارت افزائی کے پروگرامز متعارف کروائے گئے ہیں، تاکہ پاکستانی محنت کش عالمی سطح پر بہتر انداز میں کام کر سکیں۔ ان پروگرامز کے تحت او پی ایف ہر سال تقریباً پانچ ہزار افراد کو تربیت فراہم کر رہا ہے۔
ایم ڈی او پی ایف نے کہا کہ وزارتِ داخلہ اور ایف آئی اے کے ساتھ مشاورت کے بعد ایک مؤثر طریقۂ کار نافذ کیا گیا ہے، جس کے تحت پروٹیکٹر ویزہ رکھنے والوں کو آف لوڈ نہ کرنے کے فیصلے پر عملی طور پر عملدرآمد شروع ہوچکا ہے۔
انہوں نے بتایا کہ بیرونِ ملک وفات پانے والے پاکستانیوں کے لواحقین کے لیے امدادی رقم تین لاکھ روپے سے بڑھا کر دس لاکھ روپے کر دی گئی ہے، جبکہ زخمی ہونے والے افراد کو چھ لاکھ روپے فراہم کیے جائیں گے۔
تقریب میں شریک کمیونٹی شخصیات شیخ سعید احمد، محمودالحق ڈوگر، عدنان اقبال بٹ، احسن عباسی، وسیم ساجد، ڈاکٹر کنول انیس، سید ثاقب زبیر، مشتاق بلوچ، ذکاءاللہ محسن، وقار نسیم وامق اور دیگر نے اس بات پر زور دیا کہ اوورسیز پاکستانیوں کے مسائل حل کرکے اور سہولیات فراہم کرکے انہیں مزید متحرک بنایا جا سکتا ہے۔
اس موقع پر سفارت خانہ پاکستان کے ویلفیئر اتاشی نجم نواز ثاقب اور جنت حسین نے کہا کہ سفارت خانہ پاکستان کمیونٹی اور محنت کشوں کے مسائل کے حل کے لیے بھرپور کوششیں جاری رکھے ہوئے ہے۔
