جدہ (نورالحسن گجر) پاکستان قومی یکجہتی فورم جدہ کے ایک اعلیٰ سطحی وفد نے پاکستان قونصلیٹ جدہ میں نئے تعینات ہونے والے قونصل جنرل سید مصطفی ربانی سے تعارفی ملاقات کی۔ ملاقات کا مقصد قونصل جنرل کو نئی ذمہ داریاں سنبھالنے پر مبارکباد پیش کرنا اور فورم کی سرگرمیوں، اغراض و مقاصد اور کارکردگی سے آگاہ کرنا تھا۔
وفد کی قیادت نو منتخب کنوینئر پاکستان قومی یکجہتی فورم سردار وقاص عنایت نے کی۔ وفد میں مختلف سیاسی، سماجی اور فلاحی تنظیموں کے نمائندہ رہنماؤں نے شرکت کی، جن میں چوہدری محمد اکرم گجر (چیئرمین مسلم لیگ ن)، چوہدری اظہر وڑائچ (سابق مشیر و چیئرمین انویسٹرز فورم)، چوہدری تصور حسین (صدر پاکستان پیپلز پارٹی)، بشیر خان سواتی (چیئرمین پاکستان ویلفیئر سوسائٹی)، راجہ محمد ریاض (صدر رابطہ کمیٹی)، شریف الزمان (صدر پاکستان ویلفیئر فورم)، علی خورشید ملک (صدر کبابش آرٹس کونسل)، سردار اشفاق خان (صدر مسلم کانفرنس)، جان گلزار (صدر پاکستان کرسچن کمیونٹی)، بشیر (جنرل سیکرٹری پاکستان ویلفیئر سوسائٹی)، شیر خٹک (جنرل سیکرٹری اے این پی) اور چوہدری احسان الٰہی گجر (جنرل سیکرٹری آل پاکستان گجر ایسوسی ایشن) شامل تھے۔
اس موقع پر ہیڈ آف چانسلری چوہدری غلام حسین، عبداللہ گھمن اور قونصلیٹ کے دیگر افسران بھی موجود تھے۔ وفد نے قونصل جنرل کو پاکستان قومی یکجہتی فورم کے قیام، اغراض و مقاصد اور اب تک کی سرگرمیوں سے تفصیلی طور پر آگاہ کیا۔
قونصل جنرل سید مصطفی ربانی نے وفد کا خیرمقدم کرتے ہوئے فورم کی خدمات کو سراہا اور کہا کہ قومی یکجہتی وقت کی اہم ضرورت ہے۔ انہوں نے بیرونِ ملک مقیم پاکستانیوں کے مسائل کے حل اور قومی یکجہتی کے فروغ کے لیے مکمل تعاون کی یقین دہانی کرائی۔
بعد ازاں وفد نے سابق قونصل جنرل خالد مجید سے بھی ملاقات کی اور ان کی خدمات کو سراہتے ہوئے نیک تمناؤں کا اظہار کیا۔ ملاقات خوشگوار ماحول میں اختتام پذیر ہوئی، جس میں باہمی تعاون اور قومی یکجہتی کے فروغ کے عزم کا اعادہ کیا گیا۔
