ریاض — پاکستان انٹرنیشنل ایئرلائنز (پی آئی اے) کے سینئر افسر شکیل احمد، منیجر سینٹرل پروونس، سے معروف جرنلسٹ رانا عظیم نے ملاقات کی، جس میں پی آئی اے کی خدمات، درپیش چیلنجز اور بیرونِ ملک مقیم پاکستانی کمیونٹی کے ساتھ ادارے کی وابستگی پر تفصیلی گفتگو کی گئی۔
اس موقع پر شکیل احمد نے بتایا کہ وہ گزشتہ 15 برس سے پی آئی اے سے وابستہ ہیں اور ادارے کے مختلف ڈیپارٹمنٹس میں خدمات انجام دے چکے ہیں۔ انہوں نے کہا کہ انہیں پی آئی اے کے تقریباً تمام مارکیٹنگ اور آپریشنل سیکشنز میں کام کرنے کا تجربہ حاصل ہے، جبکہ ایئرپورٹس پر بھی طویل عرصہ خدمات سرانجام دیں، خصوصاً کورونا وبا کے مشکل دور میں پاکستانی مسافروں کی خدمت کا موقع ملا۔
انہوں نے کووڈ-19 کے دوران سعودی عرب کی جانب سے عائد سفری پابندیوں کا ذکر کرتے ہوئے بتایا کہ اس وقت مسافروں کو 72 گھنٹوں کے اندر سعودی عرب پہنچنا لازم تھا، بصورت دیگر ویزے اور اجازت نامے منسوخ ہونے کا خدشہ تھا۔
انہوں نے کہا، “یہ ایک بڑا چیلنج تھا، مگر پی آئی اے نے ہمیشہ کی طرح اپنے پاکستانی بھائیوں کا ساتھ دیا۔ دیگر روٹس کی پروازیں ری شیڈول کر کے اسلام آباد سے سعودی عرب کے لیے خصوصی پروازیں چلائی گئیں تاکہ مسافروں کو مشکلات سے بچایا جا سکے۔”
شکیل احمد نے مزید بتایا کہ انہوں نے راولپنڈی میں سیلز منیجر کے طور پر بھی خدمات انجام دیں، جہاں ان کی ذمہ داریوں میں کھاریاں، میرپور، سکردو، گلگت اور مظفرآباد جیسے علاقے شامل تھے۔
انہوں نے کہا، “پی آئی اے جہاں بھی کام کرتی ہے، پاکستانی عوام سے اس کا تعلق مضبوط رہتا ہے۔”
انہوں نے پی آئی اے کی اعلیٰ انتظامیہ کا شکریہ ادا کرتے ہوئے بتایا کہ حالیہ دنوں میں ریاض، سعودی عرب میں انہیں نئی ذمہ داریاں سونپی گئی ہیں، جن کے تحت وہ پاکستانی کمیونٹی کے ساتھ براہِ راست رابطے میں ہیں۔
ملاقات کے اختتام پر شکیل احمد نے اس عزم کا اظہار کیا کہ پی آئی اے آئندہ بھی پاکستانی کمیونٹی کے ساتھ مکمل تعاون جاری رکھے گی اور صحافی برادری کے ساتھ روابط مزید مستحکم کیے جائیں گے۔
