لاہور میں ٹیکنالوجی اور سائبر سیکیورٹی کے شعبے کا ایک بڑا عالمی ایونٹ گلوبل سی آئی ایس او سمٹ منعقد کیا گیا، جس میں پاکستان سمیت دنیا بھر سے سائبر سیکیورٹی اور آئی ٹی کے ماہرین نے شرکت کی۔
گلوبل سی آئی ایس او سمٹ میں جدید ٹیکنالوجی، سائبر سیکیورٹی اور ڈیجیٹل مستقبل سے متعلق اہم امور پر تفصیلی گفتگو کی گئی۔ سمٹ کا مقصد پاکستان کے ڈیجیٹل نظام کو مضبوط بنانا اور عالمی تجربات کو مقامی سطح پر متعارف کرانا تھا۔
اس موقع پر گلوبل سی آئی ایس او فورم کے صدر ڈاکٹر اردال اوزکایا، اے ایف فرگوسن اینڈ کمپنی (PwC پاکستان) کے ایگزیکٹو ڈائریکٹر سید عبدالقادر، سعودی عرب سے عدنان رفیق احمد (فاؤنڈر VCEO) اور دبئی ورلڈ ٹریڈ سینٹر کے ہیڈ آف انفارمیشن سیکیورٹی اینڈ کمپلائنس فیصل خان نے خطاب کیا۔
مقررین کا کہنا تھا کہ گلوبل سی آئی ایس او سمٹ محض ایوارڈز کی تقریب نہیں بلکہ ایک ایسا عالمی پلیٹ فارم ہے جہاں ملکی اور غیر ملکی ماہرین سائبر سیکیورٹی کو درپیش چیلنجز اور ان کے حل پر تبادلۂ خیال کرتے ہیں۔
دنیا کے 50 سے زائد ممالک سے وابستہ اس عالمی فورم کے صدر ڈاکٹر اردال اوزکایا خصوصی طور پر امریکہ سے پاکستان آئے اور لاہور میں سمٹ کی قیادت کی۔ سمٹ میں 500 سے زائد ٹیکنالوجی اور سیکیورٹی لیڈرز نے شرکت کی۔
ایونٹ میں 100 سے زائد اوورسیز پاکستانی ماہرین اور اعلیٰ عہدیداران بھی شریک ہوئے، جنہوں نے ملکی قیادت کے ساتھ مل کر آئی ٹی اور سائبر سیکیورٹی کے شعبے میں تعاون بڑھانے کے عزم کا اظہار کیا۔ سعودی عرب، متحدہ عرب امارات، برطانیہ، کینیڈا، قطر اور دیگر ممالک کے نمائندے بھی سمٹ کا حصہ تھے۔
منتظمین کے مطابق گلوبل سی آئی ایس او سمٹ پاکستان کو عالمی سطح پر ایک مضبوط ٹیکنالوجی حب بنانے میں اہم کردار ادا کرے گی اور نوجوانوں، اداروں اور انڈسٹری کے لیے نئے مواقع پیدا ہوں گے۔
