جدہ:
نائب وزیراعظم و وزیر خارجہ پاکستان سینیٹر محمد اسحاق ڈار نے آج جدہ میں قونصلیٹ جنرل آف پاکستان کی نئی چانسلری عمارت کا باضابطہ افتتاح کر دیا۔ افتتاحی تقریب میں پاکستان کے سفیر احمد فاروق، قونصل جنرل پاکستان جدہ سید مصطفیٰ ربانی، سعودی معززین، پاکستانی کمیونٹی کے افراد اور قونصلیٹ کے افسران نے شرکت کی۔
تقریب سے خطاب کرتے ہوئے نائب وزیراعظم و وزیر خارجہ نے قونصلیٹ جنرل جدہ کی کارکردگی کو سراہا اور سعودی عرب کی حکومت کے تعاون پر شکریہ ادا کیا۔ انہوں نے بیرونِ ملک مقیم پاکستانیوں کو بہتر سہولیات فراہم کرنے کے لیے حکومتِ پاکستان کے پختہ عزم کا اعادہ کیا اور نئی چانسلری میں قونصلیٹ کی تمام سرگرمیاں منتقل کرنے کی باضابطہ منظوری دی۔
سینیٹر اسحاق ڈار نے کہا کہ نئی چانسلری عمارت مغربی سعودی عرب میں مقیم تقریباً 18 لاکھ پاکستانیوں کو جدید، مؤثر اور بہتر قونصلی خدمات کی فراہمی میں اہم کردار ادا کرے گی۔
افتتاحی تقریب کے دوران قومی پرچم کشائی، شجر کاری، فیتہ کاٹنے، یادگاری تختی کی نقاب کشائی اور پاکستان و سعودی عرب کی ترقی، خوشحالی اور مضبوط تعلقات کے لیے خصوصی دعائیں کی گئیں۔ اس موقع پر نئی چانسلری کی سہولیات اور خصوصیات پر مشتمل ایک ویڈیو پریزنٹیشن بھی پیش کی گئی۔
