ریاض (رانا عظیم)
سعودی عرب میں پاکستان انٹرنیشنل ایئرلائن (پی آئی اے) ریاض ریجن کے سبکدوش ہونے والے مینیجر ملک محمد بلال احمد کے اعزاز میں ایک پروقار تقریب منعقد کی گئی، جس میں سفارتی اور پاکستانی کمیونٹی کی نمایاں شخصیات نے شرکت کی اور ان کی خدمات کو بھرپور خراجِ تحسین پیش کیا۔
سعودی دارالحکومت ریاض میں معروف سیاسی و سماجی شخصیت شیخ سعید احمد کی جانب سے منعقدہ اس تقریب میں سفارتی، سیاسی، سماجی اور ادبی شخصیات شریک ہوئیں۔ اس موقع پر سفارت خانہ پاکستان کے پریس اتاشی حسیب سلطان، ویلفیئر اتاشی نجم نواز ثاقب، چوہدری سجاد اور شیخ سعید احمد نے پی آئی اے اور ملک محمد بلال احمد کی خدمات کو سراہا۔
مقررین نے کہا کہ پی آئی اے ایک قومی ادارہ ہے جو گزشتہ کئی دہائیوں سے سعودی عرب میں مقیم پاکستانی کمیونٹی کو معیاری سفری سہولیات فراہم کر رہا ہے، جبکہ ملک محمد بلال احمد نے بطور ریاض ریجن مینیجر فرض شناسی، دیانت داری اور پیشہ ورانہ صلاحیتوں کا عملی مظاہرہ کیا۔
اس موقع پر ملک محمد بلال احمد نے کہا کہ سعودی عرب میں پاکستانی کمیونٹی نہایت متحرک کردار ادا کر رہی ہے اور بطور پی آئی اے عہدیدار ان کی ہمیشہ کوشش رہی کہ کمیونٹی اور ادارے کے درمیان روابط کو مزید مضبوط بنایا جائے تاکہ اس کے مثبت اثرات ملکی معیشت پر مرتب ہوں۔
