سعودی عرب کی زکوٰۃ، ٹیکس اور کسٹمز اتھارٹی (زاتکا) نے آج عالمی یومِ کسٹمز منایا۔ اس سال کا موضوع تھا.”کسٹمز چوکسی اور ذمہ داری کے ذریعے معاشرے کا تحفظ”۔تقریب میں کسٹمز نظام سے وابستہ مختلف اداروں کے نمائندوں نے شرکت کی۔
تقریب سے خطاب کرتے ہوئے زاتکا کے گورنر انجینئر سہیل بن محمد ابانمی نے کہا کہ کسٹمز کا نظام معاشرے کے تحفظ اور قومی سلامتی میں اہم کردار ادا کرتا ہے۔انہوں نے بتایا کہ کسٹمز نہ صرف تجارت کو آسان بناتا ہے بلکہ عوام کو بہتر سہولیات بھی فراہم کرتا ہے، جو سعودی وژن 2030 کے اہداف کے مطابق ہے۔
انہوں نے مزید کہا کہ زاتکا جدید ٹیکنالوجی، ڈیٹا تجزیے اور جدید اسکیننگ آلات کے ذریعے کسٹمز نظام کو مسلسل بہتر بنا رہا ہے۔ان اقدامات سے اسمگلنگ، غیر قانونی مالی سرگرمیوں اور ممنوعہ اشیاء کی روک تھام میں مدد مل رہی ہے، جبکہ تجارتی سرگرمیاں بھی بغیر رکاوٹ جاری رہتی ہیں۔
گورنر نے کہا کہ زاتکا نے تجارت کو آسان بنانے کے لیے ملکی اور بین الاقوامی اداروں کے ساتھ شراکت داری اور معاہدے کیے ہیں، جس سے تجارتی نظام مزید محفوظ اور مؤثر ہوا ہے۔
اپنے خطاب کے اختتام پر انہوں نے تمام کسٹمز اہلکاروں کی محنت اور قومی جذبے کو سراہا اور کہا کہ باہمی تعاون ہی محفوظ اور پائیدار مستقبل کی بنیاد ہے۔تقریب کے آخر میں زاتکا کے شراکت دار اداروں کو ان کی خدمات کے اعتراف میں اعزازات بھی دیے گئے۔
