ریاض میں مجلسِ پاکستان کے زیرِ اہتمام شہر کے ذروہ ہال میں مجلسِ پاکستان کے سابق صدر ڈاکٹر محمد آصف قریشی کے اعزاز میں ایک پُروقار استقبالیہ تقریب منعقد کی گئی۔ تقریب کی میزبانی مجلسِ پاکستان کے صدر رانا عبد الرؤف، سرپرستِ اعلیٰ سید ثاقب زبیر اور جنرل سیکریٹری رانا عمر فاروق نے کی۔
تقریب میں رانا خالد اکرم، چوہدری سجاد، چوہدری خادم حسین، محمد یوسف اسماعیل، عمر فاروق کیلانی، انعام خان، ابراہیم جٹ اور توصیف احمد سمیت ریاض میں مقیم پاکستانی کمیونٹی کے معزز افراد نے بھرپور شرکت کی۔
تقریب سے خطاب کرتے ہوئے مقررین نے ڈاکٹر محمد آصف قریشی کی سماجی، فلاحی اور تنظیمی خدمات کو زبردست خراجِ تحسین پیش کیا۔ مقررین کا کہنا تھا کہ ڈاکٹر محمد آصف قریشی نے اپنے دورِ صدارت میں مجلسِ پاکستان کو منظم اور فعال بنانے کے ساتھ ساتھ پاکستانی کمیونٹی کو متحد کرنے میں بھی نمایاں کردار ادا کیا۔ ان کی خدمات مجلسِ پاکستان کی تاریخ کا روشن باب ہیں، جنہیں ہمیشہ یاد رکھا جائے گا۔
اس موقع پر ڈاکٹر محمد آصف قریشی نے اظہارِ خیال کرتے ہوئے مجلسِ پاکستان کی قیادت اور اراکین کا شکریہ ادا کیا اور کہا کہ انہیں ہمیشہ کمیونٹی کی خدمت پر فخر رہا ہے۔ انہوں نے امید ظاہر کی کہ مجلسِ پاکستان آئندہ بھی اسی جذبے کے ساتھ پاکستانی کمیونٹی کی فلاح و بہبود کے لیے اپنا مؤثر کردار ادا کرتی رہے گی۔
