وفاقی وزیر برائے مذہبی امور و بین المذاہب ہم آہنگی سردار محمد یوسف نے مصر کے دارالحکومت قاہرہ میں سفارتخانہ پاکستان کا دورہ کیا، جہاں جامعہ الازہر میں زیرِ تعلیم 254 پاکستانی طلبہ کے نمائندگان نے ان سے ملاقات کی۔
وفاقی وزیر نے فرداً فرداً طلبہ سے ان کے تدریسی عمل، تعلیمی ماحول اور درپیش مسائل کے بارے میں دریافت کیا۔ اس موقع پر انہوں نے طلبہ کو اپنے مصری ہم منصب سے ہونے والی ملاقات میں اسکالرشپس سے متعلق ہونے والی گفتگو سے بھی آگاہ کیا۔
سردار محمد یوسف نے کہا کہ جامعہ الازہر عالمِ اسلام کے لیے مرکزی حیثیت رکھتی ہے اور فتویٰ کے حوالے سے ایک مسلمہ اور مستند ادارہ ہے۔ انہوں نے طلبہ پر زور دیا کہ وہ اس تاریخی اور لازوال ادارے سے حاصل کردہ تعلیمات کو دینی و دنیاوی علوم کے فروغ اور پاکستان کی ترقی و خوشحالی کے لیے بروئے کار لائیں۔
وفاقی وزیر نے طلبہ کو درپیش مسائل اور جامعہ الازہر میں تعلیم کے حوالے سے مزید بہتر انتظامات کے لیے دی جانے والی تجاویز پر تفصیلی تبادلہ خیال کیا اور یقین دلایا کہ وزارتِ مذہبی امور ان مسائل کے مؤثر حل کے لیے بھرپور معاونت فراہم کرے گی۔
انہوں نے طلبہ کو نصابی و غیر نصابی سرگرمیوں میں بھرپور شرکت اور پاکستان کے روشن تشخص کو اجاگر کرنے کے لیے اپنی تمام تر توانائیاں صرف کرنے کی تلقین کی۔
طلبہ نے تدریسی اور غیر نصابی سرگرمیوں کے حوالے سے چند سفارشات پیش کیں، جن پر عملدرآمد کے لیے وفاقی وزیر نے مکمل تعاون کی یقین دہانی کرائی۔
دورے کے اختتام پر وفاقی وزیر سردار محمد یوسف نے سفارتخانہ پاکستان قاہرہ میں معزز مہمانوں کی کتاب میں اپنے تاثرات بھی قلمبند کیے
