ریاض:
سعودی عرب کے دارالحکومت ریاض میں پاکستان مسلم لیگ (ن) کے زیرِ اہتمام اوورسیز پاکستانی کمیونٹی کے اعزاز میں ایک پروقار تقریب منعقد کی گئی۔ اس تقریب کا اہتمام پاکستان مسلم لیگ (ن) سعودی عرب کے جوائنٹ سیکرٹری چوہدری سجاد علی نے کیا، جبکہ امریکہ سے تشریف لائے پاکستان مسلم لیگ (ن) کے سینئر رہنما ڈاکٹر سعید احمد تقریب کے مہمانِ خصوصی تھے۔
تقریب میں پاکستان مسلم لیگ (ن) کے سعودی عرب میں مقیم عہدیداران، پارٹی کارکنان اور اوورسیز پاکستانی کمیونٹی کی بڑی تعداد نے شرکت کی۔ شرکاء نے پاکستان مسلم لیگ (ن) کی قیادت اور حکومت کی جانب سے اوورسیز پاکستانیوں کی فلاح و بہبود کے لیے کیے گئے اقدامات کو سراہا۔
تقریب سے خطاب کرتے ہوئے اوورسیز کمیونٹی کے نمائندوں نے کہا کہ پاکستان مسلم لیگ (ن) کی حکومت کی جانب سے پاسپورٹ پروٹیکٹر کے نظام کو مزید مؤثر بنانے اور اس میں سافٹ اسکلز ٹریننگ کو شامل کرنے کا اقدام نہایت قابلِ تحسین ہے۔ ان اقدامات سے بیرونِ ملک جانے والے پاکستانی ہنرمند افراد کو جدید مہارتیں حاصل کرنے کے مواقع میسر آئیں گے، جس سے نہ صرف انہیں بہتر روزگار حاصل ہوگا بلکہ عالمی سطح پر پاکستان کا مثبت تشخص بھی اجاگر ہوگا۔
شرکاء کا کہنا تھا کہ اس نوعیت کی اصلاحات بہت پہلے متعارف ہونی چاہئیں تھیں تاکہ پاکستانی افرادی قوت بیرونِ ملک جدید اسکلز سیکھ کر بہتر ملازمتیں حاصل کر سکے اور ملک و قوم کی ترقی میں مؤثر کردار ادا کرے۔
تقریب سے پاکستان مسلم لیگ (ن) سعودی عرب کے صدر شیخ سعید احمد، صدر ریاض ریجن عدنان اقبال بٹ، چوہدری سجاد علی، مخدوم امین تاجر، وسیم ساجد اور دیگر رہنماؤں نے بھی خطاب کیا۔ مقررین نے اوورسیز پاکستانیوں کو درپیش مسائل اور ان کے حل پر تفصیلی گفتگو کی۔
آخر میں مقررین نے اس عزم کا اظہار کیا کہ پاکستان مسلم لیگ (ن) اوورسیز پاکستانیوں کے حقوق کے تحفظ اور ان کی فلاح و بہبود کے لیے آئندہ بھی اپنا بھرپور کردار ادا کرتی رہے گی۔
