سعودی دارالحکومت ریاض میں مجلس پاکستان کی جانب سے الخدمت فاؤنڈیشن پاکستان کے صدر ڈاکٹر حفیظ الرحمن کے اعزاز میں ایک پروقار تقریب کا انعقاد کیا گیا، جس میں ریاض میں مقیم پاکستانی کمیونٹی نے بڑی تعداد میں شرکت کی۔
تقریب کی میزبانی رانا عبدالرؤف، سید ثاقب زبیر اور رانا عمر فاروق نے کی، جبکہ سفارت خانہ پاکستان کے ویلفیئر اتاشی صاعد عزیز نے خصوصی طور پر شرکت کی۔
تقریب سے خطاب کرتے ہوئے ڈاکٹر حفیظ الرحمن نے کہا کہ اوورسیز پاکستانی دنیا بھر میں پاکستان کے سفیر کا کردار ادا کر رہے ہیں اور ملک کا مثبت تشخص اجاگر کر رہے ہیں۔ انہوں نے کہا کہ اوورسیز پاکستانی ہی پاکستان کی اصل شناخت اور سب سے بڑا سرمایہ ہیں، جن کی محنت اور دیانت قابلِ فخر ہے۔
ڈاکٹر حفیظ الرحمن نے بتایا کہ الخدمت فاؤنڈیشن ملک میں نوجوانوں کو بااختیار بنانے کے لیے “الخدمت بنو قابل پروگرام” کے تحت عملی اقدامات کر رہی ہے، جس کا مقصد نوجوانوں کو جدید ہنر سکھا کر بیرونِ ملک روزگار کے مواقع فراہم کرنا ہے تاکہ وہ پاکستان کا نام روشن کر سکیں۔
انہوں نے مزید کہا کہ اوورسیز پاکستانیوں کا کردار صرف ترسیلاتِ زر تک محدود نہیں بلکہ وہ فلاحی، تعلیمی اور سماجی شعبوں میں بھی نمایاں خدمات انجام دے رہے ہیں۔ الخدمت فاؤنڈیشن اوورسیز پاکستانیوں کے مشوروں سے ملک میں تعلیم، صحت اور فلاحی منصوبوں کو مزید وسعت دے رہی ہے۔
تقریب کے اختتام پر شرکاء نے الخدمت فاؤنڈیشن کی فلاحی خدمات کو سراہا اور اس عزم کا اظہار کیا کہ وہ مستقبل میں بھی ان سرگرمیوں میں بھرپور تعاون جاری رکھیں گے۔
