ریاض میں یوتھ فورم کے زیر اہتمام استقبالِ رمضان کانفرنس کا انعقاد کیا گیا، جس میں شہرِ ریاض کی نمایاں سماجی و مذہبی شخصیات، نوجوانوں اور کمیونٹی کے افراد نے بھرپور شرکت کی۔ اس تقریب کا مقصد ماہِ مقدس رمضان کی تیاری، اس کی روحانی برکات کو اجاگر کرنا اور نوجوان نسل کو دینی و اخلاقی اقدار کی طرف راغب کرنا تھا۔
کانفرنس سے صدر یوتھ فورم ابراہیم جٹ، معروف عالم الغنی صدیقی اور سماجی رہنما عتیق الرحمن نے خطاب کیا۔ مقررین نے اپنے خطابات میں رمضان المبارک کی فضیلت، صبر و تقویٰ کی اہمیت اور نوجوانوں کے معاشرتی اصلاح میں کردار پر روشنی ڈالی۔
صدر یوتھ فورم ابراہیم جٹ نے کہا: “رمضان المبارک محض عبادات کا مہینہ نہیں بلکہ خود احتسابی، نظم و ضبط اور سماجی خدمت کا عملی درس بھی دیتا ہے۔ نوجوان اس بابرکت مہینے میں عبادات کے ساتھ ساتھ فلاحی سرگرمیوں میں بھی بڑھ چڑھ کر حصہ لیں۔”
معروف الغنی صدیقی نے قرآنِ مجید کے ساتھ تعلق مضبوط کرنے، نماز باجماعت کی پابندی اور باہمی رواداری کو فروغ دینے کی تلقین کی۔ انہوں نے کہا کہ رمضان ہمیں اخوت، مساوات اور ایثار کا درس دیتا ہے۔
سماجی رہنما عتیق الرحمن نے کمیونٹی کے اتحاد و یکجہتی کی ضرورت پر زور دیتے ہوئے کہا کہ ایسے اجتماعات نوجوانوں میں روحانی بیداری پیدا کرتے ہیں اور انہیں مثبت سرگرمیوں کی جانب راغب کرتے ہیں۔
تقریب میں ایڈووکیٹ معاذ بن فضل، امیر حمزہ، ابو مومن سمیت متعدد نوجوانوں نے بھرپور شرکت کی۔ یوتھ فورم کے نمائندگان اور اہلیانِ ریاض کی بڑی تعداد نے شرکت کرتے ہوئے عزم ظاہر کیا کہ رمضان المبارک میں عبادات، خیرات اور سماجی خدمات کے ذریعے معاشرے میں مثبت کردار ادا کریں گے۔
اختتام پر اجتماعی دعا کی گئی اور امتِ مسلمہ کی سلامتی، ترقی اور خوشحالی کے لیے خصوصی دعائیں مانگی گئیں۔
