ریاض — ماہِ رمضان المبارک کی آمد کے ساتھ ہی دارالحکومت ریاض میں مقیم پاکستانی کمیونٹی اور مقامی سعودی شہری ایسے مقامات کا رخ کرتے ہیں جہاں بہترین افطار کے ساتھ خوشگوار اور فیملی فرینڈلی ماحول میسر ہو۔
اسی روایت کو آگے بڑھاتے ہوئے ٹوڈے بائٹس کی جانب سے خصوصی رمضان فیسٹیول کا انعقاد کیا گیا ہے، جو افطار اور سحری کے لیے فیملیز کی توجہ کا مرکز بنا ہوا ہے۔
فیسٹیول میں روایتی پاکستانی پکوانوں کی بھرپور ورائٹی پیش کی جا رہی ہے، جن میں لائیو باربی کیو، لائیو جلیبی، مٹکا چائے اور دیگر اسٹریٹ فوڈ شامل ہیں۔ لائیو کاؤنٹرز شرکاء کی خصوصی توجہ حاصل کر رہے ہیں جہاں تازہ اور گرم کھانے موقع پر ہی تیار کیے جاتے ہیں۔
اس کے علاوہ بچوں کے لیے جھولے، کھیل کود اور تفریحی سرگرمیوں کا بھی خصوصی انتظام کیا گیا ہے تاکہ فیملیز ایک مکمل اور محفوظ ماحول میں رمضان کی شاموں سے لطف اندوز ہو سکیں۔
فیسٹیول میں نہ صرف پاکستانی کمیونٹی بلکہ سعودی اور دیگر عرب شہری بھی بھرپور شرکت کر رہے ہیں اور پاکستانی ثقافت اور روایتی ذائقوں کو سراہ رہے ہیں۔
اس موقع پر ٹوڈے بائٹس کے مالک محمود حسین کا کہنا تھا کہ ان کا مقصد صرف کھانا پیش کرنا نہیں بلکہ رمضان کے مقدس مہینے میں کمیونٹی کو ایک ایسا پلیٹ فارم فراہم کرنا ہے جہاں لوگ اپنے اہلِ خانہ کے ساتھ باوقار انداز میں افطار کریں اور ثقافتی ہم آہنگی کو فروغ دیں۔
شرکاء کا کہنا ہے کہ فیسٹیول کا ماحول، ذائقہ اور انتظامات نہایت شاندار ہیں۔ ان کے مطابق یہ اقدام نہ صرف افطار کا بہترین انتخاب ہے بلکہ مختلف ثقافتوں کے درمیان محبت اور بھائی چارے کو بھی مضبوط بناتا ہے۔ رمضان کی روح کو مدنظر رکھتے ہوئے یہ فیسٹیول عبادت، ثقافت اور کمیونٹی اسپرٹ کا حسین امتزاج پیش کر رہا ہے۔
