ریاض: دو دوستوں کی ایک متاثر کن کامیابی کی کہانی سامنے آئی ہے، جنہوں نے ایک سادہ گھریلو ذائقے کو بین الاقوامی فوڈ برانڈ "بنوں پلاؤ” میں تبدیل کر دیا۔
یہ کہانی ہے عبدالجبار اور ہاشم کیانی کی، جنہوں نے ایک خواب کو حقیقت کا روپ دیا۔ عبدالجبار، جو دبئی میں پیدا ہوئے، اور ہاشم کیانی، جو برطانیہ سے تعلق رکھتے ہیں، ایک موقع پر پاکستان گئے جہاں بنوں کے علاقے میں عبدالجبار کے گھر پر ایک دعوت کا اہتمام کیا گیا۔ اس دعوت میں پیش کیے گئے روایتی پاکستانی کھانوں نے ہاشم کیانی کو بے حد متاثر کیا۔
اسی لمحے دونوں دوستوں نے فیصلہ کیا کہ اس منفرد گھریلو ذائقے کو باقاعدہ کاروبار میں تبدیل کیا جائے۔ یوں "بنوں پلاؤ” کے نام سے ایک پاکستانی فوڈ برانڈ کی بنیاد رکھی گئی، جو دیکھتے ہی دیکھتے پاکستان بھر میں مقبول ہو گیا اور آج اس کی تقریباً 22 برانچز قائم ہو چکی ہیں۔
کامیابی کے اس سفر کو آگے بڑھاتے ہوئے دونوں دوستوں نے سعودی عرب کا رخ کیا۔ 2024 سے 2025 کے دوران تمام قانونی مراحل مکمل کرنے کے بعد 2025 میں ریاض میں پہلی برانچ کا آغاز کیا گیا، جسے شاندار پذیرائی حاصل ہوئی۔ سعودی، عرب، پاکستانی اور بنگلہ دیشی کمیونٹی سمیت مختلف قومیتوں کے افراد اس منفرد ذائقے کو بے حد پسند کر رہے ہیں۔
عبدالجبار اور ہاشم کیانی کا کہنا ہے "ہم نے بنوں میں ایک سادہ گھریلو کھانے سے یہ سفر شروع کیا تھا، اور آج الحمدللہ ہم ایک کامیاب برانڈ بن چکے ہیں۔ ریاض میں ہماری یہ پہلی برانچ ہے اور ہم جلد ہی سعودی عرب کے دیگر شہروں میں مزید برانچز کھولنے کا ارادہ رکھتے ہیں۔”
انہوں نے مزید بتایا کہ مستقبل میں برطانیہ میں بھی اس برانڈ کو متعارف کروایا جائے گا تاکہ پاکستانی ذائقہ عالمی سطح پر پہنچایا جا سکے۔
انہوں نے کہا کہ سعودی عرب میں "بنوں پلاؤ” کے ساتھ ساتھ دیگر پاکستانی کھانے بھی متعارف کروائے گئے ہیں، جن میں پاکستانی کڑاہی، مٹن روش، خصوصی نان اور روٹی شامل ہیں۔ اس کے علاوہ سفید سوجی کا حلوہ بھی مینو کا حصہ بنایا گیا ہے، جسے صارفین کی جانب سے بے حد پسند کیا جا رہا ہے۔
یہ کامیابی اس بات کی واضح مثال ہے کہ اگر جذبہ، محنت اور ایک مضبوط آئیڈیا ہو تو ایک چھوٹا سا خواب بھی عالمی کامیابی میں بدل سکتا ہے۔
