ریاض: سفارت خانہ پاکستان ریاض میں مجلس پاکستان کے ایک اعلیٰ سطحی وفد نے ویلفیئر اتاشی صاعد عزیز سے اہم ملاقات کی، جس میں اوورسیز پاکستانیوں کو درپیش مسائل اور ان کے ممکنہ حل پر تفصیلی تبادلہ خیال کیا گیا۔
وفد میں سرپرست مجلس پاکستان سید ثاقب زبیر، صدر مجلس پاکستان رانا عبدالرؤف، اور پاکستان انویسٹر اینڈ بزنس فورم کے جنرل سیکرٹری ظفر جاوید شامل تھے۔
ملاقات کے دوران اوورسیز پاکستانیوں کو درپیش مختلف مسائل، بالخصوص لیبر سے متعلق امور، قانونی رہنمائی، قونصلر سروسز اور کمیونٹی ویلفیئر کے حوالے سے اہم نکات زیر بحث آئے۔ وفد نے پاکستانی کمیونٹی کی فلاح و بہبود کے لیے سفارت خانے کی کاوشوں کو سراہتے ہوئے مزید بہتری کے لیے اپنی تجاویز بھی پیش کیں۔
اس موقع پر ویلفیئر اتاشی صاعد عزیز نے وفد کو یقین دہانی کرائی کہ سفارت خانہ اوورسیز پاکستانیوں کے مسائل کے حل کے لیے ہر ممکن اقدامات کر رہا ہے، جبکہ کمیونٹی کو سہولیات کی فراہمی کے لیے مختلف اقدامات پر مسلسل کام جاری ہے۔
ملاقات خوشگوار ماحول میں اختتام پذیر ہوئی، جس میں اس عزم کا اعادہ کیا گیا کہ مستقبل میں بھی اوورسیز پاکستانیوں کے مسائل کے حل اور ان کی فلاح و بہبود کے لیے باہمی تعاون کو مزید فروغ دیا جائے گا۔
