ریاض، – سعودی وزارتِ ثقافت کے تحت قائم گیارہ خصوصی کمیشنز میں سے ایک، سعودی کلینری آرٹس کمیشن مسلسل چوتھے سال لندن کے معروف فوڈ فیسٹیول Taste of London میں شرکت کرے گا، جہاں وہ 17 سے 21 جون 2026 تک ریجنٹس پارک میں سعودی ثقافت کے منفرد ذائقے پیش کرے گا۔
"ٹیسٹ آف سعودی کلچر” پویلین زائرین کو سعودی کھانوں کی ایک دلکش اور یادگار دنیا میں لے جائے گا، جہاں وہ روایتی پکوانوں کا ذائقہ چکھ سکیں گے، جدید سعودی مصنوعات سے متعارف ہوں گے اور سعودی مہمان نوازی کا عملی تجربہ حاصل کریں گے۔
یہ پویلین سعودی عرب کے مختلف علاقوں کی متنوع غذائی روایات اور ان کی منفرد اجزاء کو اجاگر کرے گا، جن میں سعودی قہوہ، کھجوریں، مٹھائیاں، چائے، اسٹریٹ فوڈ اور دھیمی آنچ پر تیار کیے جانے والے خصوصی پکوان شامل ہیں۔
پویلین کی خاص توجہ کا مرکز لائیو کوکنگ ایریا ہوگا، جہاں سعودی شیف روایتی کھانے تیار کرتے ہوئے ان کی تیاری کے طریقوں اور منفرد ذائقوں سے حاضرین کو روشناس کرائیں گے۔ ان پکوانوں میں روایتی حنیذ، مشہور بلیلا اور خستہ سبزیوں سے تیار کردہ مطبق شامل ہوں گے۔
مشروبات کے حصے میں سعودی ذائقوں سے متاثرہ خصوصی ڈرنکس پیش کی جائیں گی، جن میں آم کا موک ٹیل شامل ہوگا جس میں سعودی عرب کے علاقے حائل کی روایتی مرچ سرار حائلی کا منفرد ذائقہ شامل ہوگا۔ جبکہ آئس کریم اسٹیشن پر کلیجہ اور شہدِ سدر جیسے مقامی ذائقے پیش کیے جائیں گے۔
اس کے علاوہ پویلین میں سعودی خوراک اور دستکاری سے وابستہ منتخب برانڈز کی نمائش بھی ہوگی، جن میں مٹی کے برتن، عطور، چاکلیٹ، کھجوریں، چائے، قہوہ، خشک میوہ جات اور گریاں شامل ہوں گی۔ زائرین کو سعودی ثقافت کی جھلک پیش کرنے والی منفرد مصنوعات خریدنے کا بھی موقع ملے گا۔
"ٹیسٹ آف سعودی کلچر” پویلین لندن کے قلب میں سعودی دسترخوان کی روایات، اجزاء، مہمان نوازی اور ثقافتی اقدار کو عالمی ناظرین کے سامنے پیش کرنے کا ایک منفرد موقع فراہم کرتا ہے، جس کے ذریعے سعودی کھانوں اور جدید غذائی ثقافت کو بین الاقوامی سطح پر متعارف کرایا جا رہا ہے۔
