جدہ: سابق وزیراعظم پاکستان میاں محمد نواز شریف نے عمرہ کی سعادت حاصل کرنے اور روضۂ رسول ﷺ پر حاضری کے بعد پاکستان روانگی سے قبل مسلم لیگ (ن) جدہ کے عہدیداران اور کارکنان سے ملاقات کی۔
ملاقات میں مسلم لیگ (ن) جدہ کے سرپرستِ اعلیٰ مسعود احمد پوری، چیئرمین چوہدری محمد اکرم گجر، سینئر نائب صدر نور محمد آرائیں، میاں رضوان الحق، عمر مسعود پوری سمیت دیگر رہنما اور کارکنان شریک ہوئے۔
اس موقع پر پارٹی امور، اوورسیز پاکستانیوں کو درپیش مسائل اور تنظیمی معاملات پر تفصیلی تبادلۂ خیال کیا گیا۔ شرکاء نے سابق وزیراعظم میاں محمد نواز شریف کی صحت، سلامتی اور کامیابی کے لیے خصوصی دعائیں بھی کیں۔
کارکنوں نے آزاد کشمیر میں دہشت گردی اور بیرونی مداخلت کے واقعات کی شدید مذمت کرتے ہوئے خطے میں امن و استحکام کی ضرورت پر زور دیا۔ اس موقع پر نائب وزیراعظم و وزیر خارجہ اسحاق ڈار اور فیلڈ مارشل عاصم منیر کی جانب سے امن کے قیام اور کشیدگی میں کمی کے لیے کی جانے والی کوششوں کو بھی سراہا گیا۔
میاں محمد نواز شریف نے کارکنان کو ہدایت کی کہ وہ پاکستان میں سرمایہ کاری کے فروغ کے لیے فعال کردار ادا کریں اور سعودی سرمایہ کاروں کو پاکستان میں سرمایہ کاری کی ترغیب دیں تاکہ دونوں برادر ممالک کے درمیان معاشی تعاون کو مزید مستحکم بنایا جا سکے۔
ملاقات خوشگوار ماحول میں اختتام پذیر ہوئی، جبکہ شرکاء نے پارٹی قیادت کے ساتھ اپنی وابستگی کا اعادہ کرتے ہوئے ملکی ترقی اور خوشحالی کے لیے بھرپور کردار ادا کرنے کے عزم کا اظہار کیا۔
