خرطوم (نورالحسن گجر ): صدر پاکستان انویسٹرز فورم چوہدری شفقت محمود کی قیادت میں پاکستانی سرمایہ کاروں کا ایک اعلیٰ سطحی وفد ان دنوں سوڈان کے کاروباری دورے پر ہے، جہاں وفد نے سوڈان کے وزیرِ معدنیات نور الدائم محمد احمد طہ سے اہم ملاقات کی۔ ملاقات میں معدنیات کے شعبے میں سرمایہ کاری، دوطرفہ اقتصادی تعاون اور مشترکہ کاروباری مواقع پر تفصیلی تبادلۂ خیال کیا گیا۔
سوڈان کے وزیرِ معدنیات نور الدائم محمد احمد طہ نے پاکستانی وفد کا خیرمقدم کرتے ہوئے کہا کہ سوڈان قدرتی وسائل اور معدنی ذخائر سے مالا مال ملک ہے، جہاں سونا، تانبا اور دیگر قیمتی معدنیات کے شعبوں میں سرمایہ کاری کے وسیع مواقع موجود ہیں۔ انہوں نے پاکستانی سرمایہ کاروں کو مائننگ، معدنیات کی پروسیسنگ اور گولڈ ریفائنری منصوبوں میں سرمایہ کاری کی دعوت دیتے ہوئے مکمل حکومتی تعاون کی یقین دہانی کرائی۔
انہوں نے کہا کہ سوڈان کی حکومت غیر ملکی سرمایہ کاروں کو ہر ممکن سہولت فراہم کرنے کے لیے پُرعزم ہے اور سرمایہ کار 100 فیصد ملکیت کے ساتھ اپنے منصوبے قائم کر سکتے ہیں۔ انہوں نے مزید کہا کہ حکومت سرمایہ کاری کے تمام مراحل میں معاونت فراہم کرے گی تاکہ سرمایہ کاروں کو سازگار کاروباری ماحول میسر آ سکے۔
اس موقع پر صدر پاکستان انویسٹرز فورم چوہدری شفقت محمود نے سوڈان میں موجود سرمایہ کاری کے مواقع میں گہری دلچسپی کا اظہار کرتے ہوئے کہا کہ پاکستانی سرمایہ کار معدنیات، توانائی اور ویلیو ایڈیشن انڈسٹری سمیت مختلف شعبوں میں سرمایہ کاری کے امکانات کا جائزہ لے رہے ہیں۔ انہوں نے دونوں برادر ممالک کے درمیان اقتصادی اور تجارتی روابط کو مزید مستحکم بنانے کے عزم کا اعادہ کیا۔
وزیرِ معدنیات نور الدائم محمد احمد طہ نے بتایا کہ وہ جلد پاکستان اور سعودی عرب کا دورہ بھی کریں گے تاکہ سرمایہ کاروں اور کاروباری اداروں کے ساتھ روابط کو فروغ دیا جا سکے اور مشترکہ سرمایہ کاری کے نئے مواقع پیدا کیے جا سکیں۔
ملاقات خوشگوار ماحول میں اختتام پذیر ہوئی، جس میں مستقبل میں معدنیات، توانائی اور دیگر اقتصادی شعبوں میں تعاون بڑھانے اور باہمی سرمایہ کاری کو فروغ دینے پر اتفاق کیا گیا۔
