ریاض :- سعودی عرب کے دارالحکومت ریاض میں مکتبہ دارالسلام انٹرنیشنل سعودی عرب کے زیرِ اہتمام ایک پروقار تقریب منعقد ہوئی، جس میں پاک سعودی فرینڈ شپ فورم کے مرکزی چیئرمین حاجی ناصر حبیب اور وائس چیئرمین امانت مغل کو سماجی اور فلاحی خدمات کے اعتراف میں اعزازی شیلڈز سے نوازا گیا۔ تقریب میں مذہبی، سماجی، کاروباری اور کمیونٹی سے تعلق رکھنے والی ممتاز شخصیات نے شرکت کی۔
تقریب سے خطاب کرتے ہوئے مکتبہ دارالسلام انٹرنیشنل کے منیجنگ ڈائریکٹر مولانا عبدالمالک مجاہد نے کہا کہ حاجی ناصر حبیب جیسی شخصیات ہی درحقیقت کسی بھی قوم کا سرمایہ اور نوجوان نسل کے لیے مشعلِ راہ ہوتی ہیں۔ انہوں نے کہا کہ آج کے دور میں، جب دنیا خود غرضی، مادہ پرستی اور بے حسی کی لپیٹ میں ہے، ایسے افراد انسانیت کی خدمت کا روشن استعارہ بن کر معاشرے میں امید کی نئی کرن پیدا کرتے ہیں۔
انہوں نے مزید کہا کہ حاجی ناصر حبیب کی سماجی، فلاحی اور انسان دوست خدمات قابلِ تقلید ہیں، جبکہ انہیں پیش کی جانے والی اعزازی شیلڈ ان کی بے لوث خدمات کا اعتراف اور معاشرے کے لیے ایک مثبت پیغام ہے۔ ان کے بقول، ناصر حبیب انسانیت کی خدمت کا ایک روشن باب ہیں، جن کی خدمات آنے والی نسلوں کے لیے مثال کی حیثیت رکھتی ہیں۔
اس موقع پر اعزاز حاصل کرنے والے حاجی ناصر حبیب نے مکتبہ دارالسلام انٹرنیشنل کی انتظامیہ کا شکریہ ادا کرتے ہوئے کہا کہ یہ اعزاز ان کے لیے صرف ایک شیلڈ نہیں بلکہ ان کی سماجی خدمات پر اعتماد اور حوصلہ افزائی کی علامت ہے۔ انہوں نے کہا کہ انسانیت کی خدمت ان کے لیے محض ایک ذمہ داری نہیں بلکہ دلی اطمینان اور روحانی سکون کا ذریعہ ہے، اور وہ آئندہ بھی اسی جذبے کے ساتھ معاشرے کی خدمت جاری رکھیں گے۔
تقریب کے دوران امانت مغل کو بھی سماجی خدمات اور کمیونٹی کے لیے نمایاں کردار ادا کرنے پر اعزازی شیلڈ پیش کی گئی، جبکہ مقررین نے ان کی خدمات کو بھی سراہتے ہوئے انہیں مبارکباد پیش کی۔
تقریب سے خطاب کرنے والے دیگر مقررین نے کہا کہ معاشرے کی ترقی اور استحکام کے لیے ایسے افراد کی خدمات نہایت اہم ہیں، جو بلا امتیاز انسانیت کی خدمت کو اپنا مشن بناتے ہیں۔ انہوں نے حاجی ناصر حبیب اور امانت مغل کی خدمات کو خراجِ تحسین پیش کرتے ہوئے اس امید کا اظہار کیا کہ وہ آئندہ بھی اسی جذبے کے ساتھ فلاحی سرگرمیوں کو فروغ دیتے رہیں گے۔
تقریب کے اختتام پر دونوں شخصیات کو اعزازی شیلڈز پیش کی گئیں، جبکہ شرکاء نے ان کی سماجی خدمات کو سراہتے ہوئے نیک تمناؤں کا اظہار کیا۔
