جدہ (نورالحسن گجر ): بہاولنگر سے رکنِ صوبائی اسمبلی کاشف نوید محمود جٹ پنسوٹہ عمرہ کی سعادت کے لیے سعودی عرب پہنچے تو یارانِ جدہ آفس آمد پر یارانِ جدہ گروپ کی جانب سے ان کا پرتپاک اور والہانہ استقبال کیا گیا۔
اس موقع پر یارانِ جدہ کے سرپرستِ اعلیٰ اور سابق مشیر برائے وزیرِ اعلیٰ پنجاب چوہدری اظہر عباس وڑائچ نے تمام شرکاء کی جانب سے مہمانِ خصوصی کو عمرہ کی سعادت پر مبارکباد پیش کی، شرکاء کا تعارف کروایا اور اوورسیز پاکستانی کمیونٹی کے کردار پر روشنی ڈالتے ہوئے کاشف نوید محمود جٹ پنسوٹہ کی عوامی خدمات کو سراہا۔
اپنے خطاب میں رکنِ صوبائی اسمبلی کاشف نوید محمود جٹ پنسوٹہ نے یارانِ جدہ گروپ اور تمام شرکاء کا شکریہ ادا کرتے ہوئے کہا کہ دوستوں سے ملاقات کر کے بے حد خوشی ہوئی۔ انہوں نے کہا کہ اوورسیز پاکستانی پاکستان کا قیمتی سرمایہ اور ملک کے حقیقی سفیر ہیں۔ وزیراعلیٰ پنجاب مریم نواز شریف کی قیادت میں پنجاب حکومت اوورسیز پاکستانیوں کے مسائل کے حل اور انہیں ہر ممکن سہولیات کی فراہمی کے لیے ترجیحی بنیادوں پر اقدامات کر رہی ہے۔
انہوں نے کہا کہ اوورسیز پنجاب کمیشن، خصوصی عدالتوں اور دیگر عوامی فلاحی منصوبوں کے ذریعے بیرونِ ملک مقیم پاکستانیوں کو بہتر خدمات فراہم کی جا رہی ہیں تاکہ ان کے مسائل کو جلد اور مؤثر انداز میں حل کیا جا سکے۔
انہوں نے مزید کہا کہ جدہ میں جس محبت، عزت اور خلوص کے ساتھ ان کا استقبال کیا گیا، وہ اس پر یارانِ جدہ گروپ اور پاکستانی کمیونٹی کے تمام دوستوں کے تہہ دل سے شکر گزار ہیں۔
تقریب کے اختتام پر شرکاء نے کاشف نوید محمود جٹ پنسوٹہ کو عمرہ کی سعادت حاصل کرنے پر مبارکباد پیش کی، ان کی کامیابی، صحت اور پاکستان کی ترقی و خوشحالی کے لیے خصوصی دعا بھی کی گئی۔
