لاہور: پنڈی گھیب کی معروف سیاسی و سماجی شخصیت اور سابق جنرل سیکرٹری پاکستان مسلم لیگ (ن) تحصیل پنڈی گھیب چوہدری ساجد حسین کھٹانہ نے اپنے ساتھیوں چوہدری عبدالمالک کھٹانہ، حاجی اختر حسین، ملک امانت خان راول اور آصف علی ملک کے ہمراہ پاکستان پیپلز پارٹی میں شمولیت اختیار کر لی۔
اس موقع پر وفد نے گورنر پنجاب سردار سلیم حیدر خان سے ملاقات کی، جنہوں نے انہیں پاکستان پیپلز پارٹی میں شمولیت پر خوش آمدید کہا اور نیک خواہشات کا اظہار کیا۔
ملاقات کے دوران پنڈی گھیب اور گردونواح کی ترقی، عوامی فلاح و بہبود، بنیادی سہولیات کی فراہمی، انفراسٹرکچر کی بہتری اور عوام کو درپیش مسائل کے حل کے حوالے سے تفصیلی تبادلہ خیال کیا گیا۔
گورنر پنجاب سردار سلیم حیدر خان نے وفد کو یقین دلایا کہ علاقے کی ترقی اور عوامی مسائل کے حل کے لیے ہر ممکن اقدامات کیے جائیں گے اور عوامی فلاحی منصوبوں کو ترجیحی بنیادوں پر آگے بڑھایا جائے گا۔
اس موقع پر چوہدری ساجد حسین کھٹانہ نے کہا کہ پاکستان پیپلز پارٹی میں شمولیت کا مقصد عوام کی خدمت، علاقے کی ترقی اور عوامی مسائل کے مؤثر حل کے لیے اپنا کردار ادا کرنا ہے۔ انہوں نے کہا کہ وہ پارٹی قیادت کی رہنمائی میں عوام کی توقعات پر پورا اترنے اور علاقائی ترقی کے لیے بھرپور انداز میں کام کریں گے۔
انہوں نے اس عزم کا بھی اظہار کیا کہ پاکستان پیپلز پارٹی کے پلیٹ فارم سے عوامی خدمت کے سفر کو مزید مؤثر بنایا جائے گا اور علاقے کی خوشحالی کے لیے ہر ممکن کوشش جاری رکھی جائے گی۔
