جدہ:سعودی عرب میں مقیم اوورسیز پاکستانی کمیونٹی نے سعودی عرب اور ترکیہ کے درمیان دفاعی تعاون کے معاہدے کو ایک تاریخی اور اہم پیش رفت قرار دیتے ہوئے اس کا بھرپور خیرمقدم کیا ہے۔
اوورسیز پاکستانی کمیونٹی نے کہا کہ یہ معاہدہ عالمِ اسلام کے درمیان اتحاد، اتفاق اور یکجہتی کے فروغ کی جانب ایک اہم قدم ہے، جبکہ اس سے خطے میں امن، استحکام اور باہمی دفاعی تعاون کو مزید مضبوط بنانے میں مدد ملے گی۔
اس موقع پر سعودی عرب میں مقیم اوورسیز پاکستانیوں نے اپنے خیالات کا اظہار کرتے ہوئے کہا کہ سعودی عرب، پاکستان اور ترکیہ کے درمیان بڑھتا ہوا تعاون خطے میں امن و استحکام کے لیے مثبت اور حوصلہ افزا پیش رفت ہے۔ انہوں نے امید ظاہر کی کہ یہ معاہدہ باہمی تعاون اور مشترکہ مفادات کے لیے نئی راہیں کھولے گا۔
اوورسیز پاکستانی کمیونٹی نے سعودی عرب کے ولی عہد شہزادہ محمد بن سلمان، پاکستان کے فیلڈ مارشل سید عاصم منیر، وزیراعظم پاکستان میاں محمد شہباز شریف اور ترکیہ کے صدر رجب طیب اردوان کو اس اہم پیش رفت پر مبارکباد پیش کرتے ہوئے ان کی قیادت اور کاوشوں کو خراجِ تحسین پیش کیا۔
کمیونٹی رہنماؤں نے اس عزم کا اظہار کیا کہ سعودی عرب میں مقیم پاکستانی ہمیشہ سعودی عرب اور پاکستان کے درمیان مضبوط برادرانہ تعلقات اور باہمی تعاون کے فروغ کے لیے اپنا مثبت کردار ادا کرتے رہیں گے۔
