ریاض: پاکستان مسلم لیگ ن ریاض ریجن کے صدر عدنان اقبال بٹ کی جانب سے پاکستان، سعودی عرب اور ترکیہ کے درمیان ہونے والے اہم دفاعی معاہدے کے حوالے سے مسلم لیگ ہاؤس ریاض میں ایک اہم پریس کانفرنس کا انعقاد کیا گیا۔
پریس کانفرنس سے خطاب کرتے ہوئے صدر پاکستان مسلم لیگ ن ریاض ریجن عدنان اقبال بٹ نے پاکستان، سعودی عرب اور ترکیہ کے درمیان دفاعی تعاون کو خوش آئند اور تاریخی پیش رفت قرار دیا۔ انہوں نے کہا کہ تینوں برادر ممالک کے درمیان مضبوط دفاعی تعاون خطے میں امن، استحکام اور باہمی سلامتی کے فروغ کے لیے اہم کردار ادا کرے گا۔
انہوں نے کہا کہ پاکستان اور سعودی عرب کے درمیان تاریخی، برادرانہ اور دیرینہ تعلقات پوری دنیا کے لیے ایک مثال ہیں۔ وقت کا تقاضا ہے کہ ان تعلقات کو مزید مضبوط بنایا جائے اور دفاعی تعاون کے ساتھ ساتھ تجارت، سرمایہ کاری، معیشت، ٹیکنالوجی اور دیگر شعبوں میں بھی دوطرفہ تعاون کو فروغ دیا جائے۔
عدنان اقبال بٹ نے کہا کہ پاکستان، سعودی عرب اور ترکیہ کے درمیان بڑھتا ہوا تعاون تینوں ممالک کے باہمی اعتماد اور مشترکہ مفادات کی عکاسی کرتا ہے۔ انہوں نے اس امید کا اظہار کیا کہ یہ دفاعی تعاون خطے میں امن و استحکام کے قیام اور مسلم دنیا کے درمیان اتحاد و یکجہتی کے فروغ میں مثبت کردار ادا کرے گا۔
اس موقع پر کوآرڈینیٹر ریاض ریجن چوہدری سجاد علی، صدر کے پی کے ونگ فضل رحیم صافی، صدر ایسٹ ریاض ریجن چوہدری جمیل ربانی، سرپرست اعلیٰ سعودی عرب ڈاکٹر محمود باجوہ، سرپرست اعلیٰ ریاض ریجن مخدوم امین تاجر، نائب صدر ریاض اسلم عاشق، صدر بٹل چھتر فلاحی تنظیم ظفر اقبال، صدر یوتھ ونگ سعودی عرب ملک جی ایم اعوان اور سماجی کارکن محمد افضل سمیت پاکستان مسلم لیگ ن ریاض ریجن کے دیگر عہدیداران اور اراکین بھی موجود تھے۔
شرکاء نے پاکستان، سعودی عرب اور ترکیہ کے درمیان دفاعی معاہدے کا خیرمقدم کرتے ہوئے اسے تینوں ممالک کے درمیان برادرانہ تعلقات، باہمی اعتماد اور مشترکہ سلامتی کے لیے ایک اہم پیش رفت قرار دیا۔
