جدہ: (نورالحسن) اوورسیز پاکستانی والنٹیئرز گروپ (OPVG) جدہ کے زیرِ اہتمام پاکستان کے 79ویں یومِ آزادی کے حوالے سے ایک پروقار اور شاندار تقریب کا انعقاد کیا گیا، جس میں پاکستانی کمیونٹی کی بڑی تعداد، فیملیز اور بچوں نے بھرپور شرکت کی۔ تقریب میں ملی نغموں، بچوں کی خوبصورت پرفارمنس، تقاریر، ٹیبلوز اور مختلف ثقافتی پروگراموں نے سماں باندھ دیا، جبکہ بچوں کی شاندار فنکارانہ صلاحیتوں کو شرکاء نے بھرپور سراہا۔
تقریب کی صدارت OPVG جدہ کے صدر گل شہزاد جدون نے کی، جبکہ میزبانی کے فرائض علی احمد نے انجام دیے۔ تقریب کے مہمانانِ خصوصی چیئرمین پاکستان انویسٹرز فورم چوہدری شفقت محمود اور پاکستان انٹرنیشنل اسکول کی اکیڈمک پرنسپل صدیقہ مقصود ملک تھیں۔
تقریب سے خطاب کرتے ہوئے OPVG جدہ کے صدر گل شہزاد جدون نے تمام مہمانوں اور شرکاء کو خوش آمدید کہا اور انہیں یومِ آزادی کی مبارکباد پیش کی۔ انہوں نے OPVG کی کمیونٹی اور فلاحی خدمات پر روشنی ڈالتے ہوئے کہا کہ یہ تقریب چیئرمین و بانی OPVG ابرار احمد کی ہدایت پر منعقد کی گئی ہے۔ انہوں نے کہا کہ اوورسیز پاکستانی کمیونٹی کی خدمت اور فلاحی سرگرمیوں میں اپنا کردار ادا کرنا فورم کی اولین ترجیحات میں شامل ہے۔
مہمانانِ خصوصی چوہدری شفقت محمود اور صدیقہ مقصود ملک نے OPVG کی رضاکارانہ کمیونٹی خدمات، انتھک محنت اور فلاحی سرگرمیوں کو سراہتے ہوئے منتظمین کو خراجِ تحسین پیش کیا۔ انہوں نے شرکاء کو یومِ آزادی کی مبارکباد دی اور فورم کی فلاحی سرگرمیوں میں ہر ممکن تعاون کی یقین دہانی کرائی۔
تقریب سے چیئرمین مسلم لیگ (ن) چوہدری اکرم گجر، چیئرمین پاک میڈیا جرنلسٹ فورم چوہدری نورالحسن گجر، چیئرمین کبابش آرٹ کونسل علی خورشید ملک، چوہدری محمد طارق اور دیگر مقررین نے بھی خطاب کیا۔ مقررین نے یومِ آزادی کی مبارکباد پیش کرتے ہوئے خوبصورت اور بامقصد تقریب کے انعقاد پر OPVG کی انتظامیہ کو سراہا اور فورم کی فلاحی و کمیونٹی خدمات کو خراجِ تحسین پیش کیا۔
تقریب کا ایک نمایاں حصہ بچوں کی شاندار پرفارمنس تھی۔ بچوں نے ملی نغمے، تقاریر اور مختلف ٹیبلوز پیش کرکے حاضرین سے بھرپور داد وصول کی۔ خصوصاً بچیوں کی تیاری، نظم و ضبط اور خوبصورت انداز میں پیش کی جانے والی پرفارمنس کو شرکاء نے بے حد سراہا۔ اس موقع پر فورم کی سینئر رکن اور معروف سوشل ایکٹوسٹ صفیہ زوہیب علی کو بچوں کی تیاری اور شاندار پرفارمنس میں خصوصی کردار ادا کرنے پر خراجِ تحسین پیش کیا گیا۔
تقریب کے اختتام پر منتظمین گل شہزاد جدون، علی احمد، نعیم اختر، کاشف رزاق، راشد محمود اور سلیمان بٹ سمیت دیگر عہدیداران نے کمیونٹی کی سرکردہ شخصیات اور تقریب میں نمایاں کارکردگی کا مظاہرہ کرنے والوں میں خصوصی شیلڈز تقسیم کیں۔
بعد ازاں شرکاء نے مل کر یومِ آزادی کا کیک کاٹا اور پاکستان کی سلامتی، ترقی، استحکام اور خوشحالی کے لیے خصوصی دعا کی۔
