ریاض: سعودی دارالحکومت ریاض میں یوتھ فورم کے زیرِ اہتمام پاکستان کے یومِ آزادی کے سلسلے میں ایک پروقار اور شاندار تقریب کا انعقاد کیا گیا، جس میں سرپرستِ یوتھ فورم سید ثاقب زبیر، معروف سماجی شخصیت غنی صدیقی، صدر یوتھ فورم ابراہیم جٹ، پاکستانی کمیونٹی کے عمائدین، نوجوانوں، سماجی شخصیات، صحافتی برادری اور اہلیانِ ریاض کی بڑی تعداد نے شرکت کی۔
تقریب کے دوران پاکستانی پرچموں کی بہار اور ملی نغموں نے ماحول کو قومی جوش و جذبے سے بھر دیا۔ شرکاء نے تحریکِ آزادی، قیامِ پاکستان کے لیے دی جانے والی لازوال قربانیوں اور وطنِ عزیز سے اپنی والہانہ محبت کا اظہار کیا۔
اس موقع پر خطاب کرتے ہوئے سرپرستِ یوتھ فورم سید ثاقب زبیر نے کہا کہ پاکستان ہماری پہچان، محبت اور فخر ہے۔ بیرونِ ملک مقیم پاکستانیوں کے دل ہمیشہ وطنِ عزیز کے ساتھ دھڑکتے ہیں۔ انہوں نے کہا کہ ریاض میں پاکستانی نوجوانوں اور کمیونٹی کی بڑی تعداد میں جشنِ آزادی میں شرکت اس بات کا ثبوت ہے کہ وطن سے محبت نسل در نسل منتقل ہو رہی ہے۔
انہوں نے کہا کہ نوجوان پاکستان کا مستقبل ہیں اور انہیں تعلیم، محنت، بہترین کردار اور اتحاد کے ذریعے ملک و قوم کی خدمت کے لیے آگے بڑھنا ہوگا۔ بیرونِ ملک مقیم پاکستانی کمیونٹی پاکستان کے مثبت تشخص کو اجاگر کرنے اور سعودی عرب اور پاکستان کے برادرانہ تعلقات کو مزید مضبوط بنانے میں اپنا کردار ادا کرتی رہے گی۔
صدر یوتھ فورم ابراہیم جٹ نے اپنے خطاب میں جشنِ آزادی کی تقریب میں شرکت کرنے والے اہلیانِ ریاض، پاکستانی کمیونٹی، نوجوانوں اور صحافتی برادری کا خصوصی شکریہ ادا کیا۔ انہوں نے کہا کہ شرکاء کی بڑی تعداد نے تقریب کی رونق اور قومی جذبے کو مزید بڑھا دیا۔
ابراہیم جٹ نے کہا کہ بیرونِ ملک مقیم پاکستانی اپنے ملک کے سفیر ہیں اور انہیں اپنے کردار، محنت اور مثبت رویے کے ذریعے پاکستان کا نام روشن کرنا چاہیے۔ انہوں نے کہا کہ یوتھ فورم پاکستانی نوجوانوں کو ایک مثبت، تعمیری اور فعال پلیٹ فارم فراہم کرنے کے لیے اپنی سرگرمیاں جاری رکھے گا۔
تقریب سے دیگر مقررین نے بھی خطاب کیا اور پاکستان سے اپنی محبت و وابستگی کا اظہار کرتے ہوئے وطنِ عزیز کی ترقی، استحکام اور خوشحالی کے لیے اپنے عزم کا اعادہ کیا۔ مقررین نے قیامِ پاکستان کے لیے دی جانے والی قربانیوں کو خراجِ عقیدت پیش کرتے ہوئے کہا کہ آزادی ایک عظیم نعمت ہے، جس کی قدر اور حفاظت ہم سب کی مشترکہ ذمہ داری ہے۔
تقریب کے اختتام پر پاکستان کی سلامتی، استحکام، ترقی اور خوشحالی کے لیے خصوصی دعائیں کی گئیں، جبکہ شرکاء نے ملی جوش و جذبے کے ساتھ پاکستان زندہ باد کے نعرے بلند کیے۔
یوتھ فورم کی جانب سے تمام مہمانوں، شرکاء اور پاکستانی کمیونٹی کا شکریہ ادا کرتے ہوئے اس عزم کا اظہار کیا گیا کہ سعودی عرب میں پاکستانی کمیونٹی کی فلاح، اتحاد، نوجوانوں کی مثبت سرگرمیوں اور پاکستان کے مثبت تشخص کے فروغ کے لیے کوششیں جاری رکھی جائیں گی۔
