ریاض ( رانا عظیم) سعودی عرب کے دارالحکومت ریاض میں پاکستان پیپلز پارٹی ریاض ریجن کے زیرِ اہتمام شاعرِ مشرق ڈاکٹر علامہ محمد اقبالؒ کی فکر، فلسفۂ خودی اور شاعری کو اجاگر کرنے کے لیے ایک ادبی و فکری نشست کا انعقاد کیا گیا، جس میں پارٹی عہدیداران، کارکنان، شعراء، ادیبوں اور دانشوروں نے شرکت کی۔ نشست میں علامہ اقبال کے پیغامِ خودی، نوجوان نسل کی فکری و اخلاقی تربیت اور امتِ مسلمہ میں بیداری کے حوالے سے ان کے افکار پر تفصیلی گفتگو کی گئی۔
تقریب سے خطاب کرتے ہوئے پاکستان پیپلز پارٹی ریاض ریجن کے صدر احسن عباسی نے کہا

کہ علامہ اقبال کا کلام انسان کو خود شناسی، خود اعتمادی اور مسلسل جدوجہد کا درس دیتا ہے۔ ان کے نزدیک فلسفۂ خودی محض ایک تصور نہیں بلکہ انسان کو اپنی صلاحیتوں پہچاننے، اپنی منزل کا تعین کرنے اور بلند مقاصد کے حصول کے لیے عملی جدوجہد کی ترغیب دیتا ہے۔

پاکستان پیپلز پارٹی مڈل ایسٹ کے سیکریٹری جنرل محمد خالد رانا نے اپنے خطاب میں کہا

کہ علامہ اقبال نے برصغیر کے مسلمانوں میں آزادی، خودداری اور الگ قومی تشخص کا شعور بیدار کرنے میں اہم فکری کردار ادا کیا۔ انہوں نے کہا کہ اقبال کا پیغام آج بھی اتنا ہی اہم ہے جتنا ماضی میں تھا، اور نوجوان نسل کو ان کے افکار سے روشناس کرانا وقت کی اہم ضرورت ہے۔

اس موقع پر پاکستان پیپلز پارٹی ویمن ونگ گلف کی جنرل سیکریٹری فرح عباسی، مشتاق بلوچ، شریف بلوچ بھٹو، طیب رضا کاظمی، وقار نسیم وامق اور کامران اشرف نے بھی اپنے خیالات کا اظہار کیا۔ مقررین نے علامہ اقبال کی شاعری کے ادبی، فکری اور فلسفیانہ پہلوؤں پر روشنی ڈالتے ہوئے کہا کہ فلسفۂ خودی انسان کو اپنی پہچان، ذمہ داریوں اور صلاحیتوں کا احساس دلاتا ہے۔ اقبال کا کلام نوجوانوں میں بلند حوصلے، جرات، خود اعتمادی اور مسلسل محنت کے ذریعے کامیابی حاصل کرنے کا جذبہ پیدا کرتا ہے۔
مقررین کا کہنا تھا کہ آج کی نوجوان نسل کو فکرِ اقبال سے جوڑنا ضروری ہے تاکہ وہ علم، کردار اور خود اعتمادی کو اپنا شعار بنا کر معاشرے اور ملک کی ترقی میں مؤثر کردار ادا کر سکے۔ انہوں نے بیرونِ ملک پاکستانی کمیونٹی میں ایسی ادبی و فکری تقریبات کے انعقاد کو بھی اہم قرار دیا اور کہا کہ ان سرگرمیوں کے ذریعے نئی نسل کو پاکستان کی تاریخ، قومی شخصیات اور ادبی و ثقافتی ورثے سے وابستہ رکھنے میں مدد ملتی ہے۔
تقریب کے اختتام پر اس عزم کا اظہار کیا گیا کہ علامہ اقبال کی فکر اور فلسفۂ خودی کو محض تقریبات اور تقاریر تک محدود رکھنے کے بجائے اسے عملی زندگی، تعلیم، کردار سازی اور نوجوانوں کی فکری رہنمائی کا حصہ بنایا جائے۔ شرکاء نے اس بات پر بھی زور دیا کہ فکرِ اقبال کے فروغ کے لیے ادبی، تعلیمی اور فکری سرگرمیوں کا تسلسل برقرار رکھا جائے تاکہ اقبال کا پیغام نئی نسل تک مؤثر انداز میں پہنچ سکے۔

