ریاض (رانا عظیم) — مجلسِ پاکستان کے زیرِ اہتمام معروف دینی و سیاسی رہنما ڈاکٹر فرید احمد پراچہ کے اعزاز میں ایک پُروقار عشائیہ منعقد کیا گیا۔ تقریب کی نظامت کے فرائض حافظ محمود ارشد نے انجام دیے، جبکہ رانا عبدالرؤف صدر مجلسِ پاکستان نے مہمانِ خصوصی اور شرکائے تقریب کا خیرمقدم کیا۔
تقریب میں ممتاز مذہبی، سماجی اور سیاسی شخصیات بشمول مولانا عبدالمالک مجاہد، رانا خالد اکرم، قاضی اسحاق میمن، احسن عباسی، پروفیسر محمد رفیق، مخدوم امین تاجر، قاری عبدالی، عمر فاروق کیلانی، اور انعام خان نے شرکت کی۔
اس موقع پر خطاب کرتے ہوئے ڈاکٹر فرید احمد پراچہ نے کہا کہ پاکستان ایک نظریاتی ریاست ہے جس کی بنیاد اسلام پر ہے، اور ہمیں اپنے ملک کو حقیقی معنوں میں اسلامی فلاحی ریاست بنانے کے لیے کردار ادا کرنا ہوگا۔ انہوں نے کہا کہ بیرونِ ملک مقیم پاکستانی نہ صرف معیشت بلکہ قومی تشخص کے بھی سفیر ہیں، جن کی محنت، دیانت اور اتحاد پاکستان کی اصل طاقت ہے۔
تقریب میں نائب صدر مجلس پاکستان رانا سرفراز، جنرل سیکریٹری رانا عمر فاروق، صدر یوتھ فورم محمد ابراہیم جٹ، اور توصیف احمد سمیت تنظیم کے دیگر ذمہ داران نے بھی شرکت کی۔
ڈاکٹر فرید احمد پراچہ نے پاک سعودی دفاعی معاہدے کو ایک اہم سنگ میل قرار دیتے ہوئے کہا کہ یہ معاہدہ دونوں ممالک کے تعلقات کو نئی بلندیوں تک لے جائے گا۔ انہوں نے کہا کہ مجلسِ پاکستان جیسے فورمز قومی و ملی شعور کو بیدار رکھنے میں مؤثر کردار ادا کر رہے ہیں۔
انہوں نے تنظیم کے رہنماؤں اور کارکنان کی کاوشوں کو سراہتے ہوئے کہا کہ ہمیں سیاسی، فرقہ وارانہ اور علاقائی اختلافات سے بالاتر ہو کر پاکستان کی ترقی و خوشحالی کے لیے کام کرنا چاہیے۔ مجلسِ پاکستان نے جس طرح مختلف سیاسی جماعتوں کو ایک پلیٹ فارم پر جمع کیا ہے، وہ لائقِ تحسین ہے۔
آخر میں رانا عبدالرؤف نے تمام معزز مہمانوں کا شکریہ ادا کیا۔ تقریب کے اختتام پر عشائیہ پیش کیا گیا اور پاکستان کی ترقی و استحکام کے لیے خصوصی دعا کی گئی۔
