سعودی عرب میں پیپلز یوتھ آرگنائزیشن کے زیرِ اہتمام سابق وزیراعظم محترمہ بینظیر بھٹو شہید کی برسی کے موقع پر ایک پروقار تقریب منعقد کی گئی، جس میں مقررین اور شرکاء نے محترمہ بینظیر بھٹو شہید کی قومی، جمہوری اور عوامی خدمات کو زبردست خراجِ عقیدت پیش کیا۔
تقریب سعودی عرب کے دارالحکومت ریاض میں منعقد ہوئی، جہاں پیپلز یوتھ آرگنائزیشن سعودی عرب کے صدر اعجاز رحیم، صدر پاکستان پیپلز پارٹی ریاض ریجن احسن عباسی اور پی وائی او گلف کے صدر احتشام جاوید کوہلی نے خطاب کیا۔ مقررین نے کہا کہ محترمہ بینظیر بھٹو شہید پاکستان میں جمہوریت کی مضبوط علامت تھیں، جنہوں نے شہید ذوالفقار علی بھٹو کے وژن کے مطابق عام آدمی کی فلاح، معاشی استحکام اور عالمی سطح پر پاکستان کے وقار کے لیے مؤثر کردار ادا کیا۔
پیپلز پارٹی ریاض ریجن کے نائب صدر وسیم ساجد، جنرل سیکرٹری سردار رزاق، نائب صدر گلف مشتاق بلوچ، قریب اللہ خان اور الیاس رحیم نے اپنے خطاب میں کہا کہ محترمہ بینظیر بھٹو شہید کا مشن آج بھی زندہ ہے، اور چیئرمین بلاول بھٹو زرداری کی قیادت میں اسے پوری قوت کے ساتھ آگے بڑھایا جا رہا ہے۔ ان کا کہنا تھا کہ جمہوریت کے استحکام اور عوامی حقوق کے تحفظ کی جدوجہد جاری رہے گی۔
تقریب سے وقار نسیم وامق، عدنان اقبال بٹ، محمودالحق ڈوگر، سردار نصیر، جنید اشرف، کاشف جاوید، کامران حسانی اور عابد نقیب سمیت دیگر مقررین نے بھی خطاب کیا اور محترمہ بینظیر بھٹو شہید کی سیاسی بصیرت، عوامی خدمات اور جمہوری جدوجہد کو خراجِ تحسین پیش کیا۔
