سعودی عرب کے دارالحکومت ریاض میں یوتھ فورم کے زیرِ اہتمام ایک شاندار مشاعرے کا انعقاد کیا گیا، جس میں اوورسیز پاکستانیوں نے بڑی تعداد میں شرکت کی اور پاکستانی ادب سے اپنی گہری وابستگی کا اظہار کیا۔
مشاعرے کی صدارت رانا عبدالروف، صدر مجلس پاکستان، نے کی، جبکہ سید ثاقب زبیر، محمد ابراہیم جٹ، وقار نسیم وامق اور ملک بلال احمد بطور مہمانانِ گرامی شریک ہوئے۔ معروف الغنی صدیقی اور توصیف احمد نے نظامت کے فرائض خوش اسلوبی سے انجام دیے۔
مشاعرے میں معروف شعراء وقار نسیم وامق، شجاع الزمان شاد، سید طیب رضا کاظمی، کامران حسانی، ذواق علی ذکی، انیب ارشد، پروفیسر ساجد محمود، سید وقاص، عظمت اللہ بھٹہ، مزمل بانڈے، کامران اشرف اور دیگر شعراء نے اپنی شاعری سے سامعین کو محظوظ کیا۔ اوورسیز پاکستانیوں کی بھرپور شرکت نے مشاعرے کو یادگار بنا دیا۔
اس موقع پر سید ثاقب زبیر نے کہا کہ اس نوعیت کی ادبی محفلیں اوورسیز پاکستانیوں کو اپنے جذبات کے اظہار اور وطن سے تعلق مضبوط کرنے کا موقع فراہم کرتی ہیں۔ صدرِ مشاعرہ رانا عبدالروف نے کہا کہ یوتھ فورم کی یہ ادبی کاوش ریاض میں ادب کے فروغ میں اہم کردار ادا کرے گی۔
مشاعرے کے اختتام پر یوتھ فورم کے فعال اراکین کو شیلڈز اور یادگاری تحائف پیش کیے گئے۔ شرکاء نے اس ادبی محفل کو ریاض میں اردو ادب کے فروغ کی جانب ایک مثبت قدم قرار دیا۔
