ریاض (رانا عظیم)
سعودی عرب کے دارالحکومت ریاض میں مقیم پاکستانی مسیحی برادری کی جانب سے کرسمس کی خوشیوں کے موقع پر ایک پروقار تقریب منعقد کی گئی، جس میں پاکستانی مسیحی مرد و خواتین نے بڑی تعداد میں شرکت کی۔
یہ تقریب پاکستانی کرسچن کمیونٹی کے زیرِ اہتمام منعقد ہوئی، جس کے مہمانِ خصوصی پاکستان کے سفیر احمد فاروق تھے۔ تقریب سے خطاب کرتے ہوئے پاکستانی کرسچن کمیونٹی کے چیئرمین جان (جون) گلزار نے تمام شرکاء کو کرسمس کی دلی مبارکباد پیش کی۔ انہوں نے حکومتِ پاکستان، افواجِ پاکستان اور سفارتخانۂ پاکستان ریاض کا شکریہ ادا کرتے ہوئے کہا کہ پاکستانی مسیحی برادری اپنے وطن سے گہری محبت رکھتی ہے اور پاکستان کی ترقی و خوشحالی کے لیے ہمہ وقت دعاگو ہے۔
انہوں نے پاکستان میں کرسمس کی سرکاری سطح پر تقریبات کو بین المذاہب ہم آہنگی اور مذہبی رواداری کی بہترین مثال قرار دیا۔
اس موقع پر مہمانِ خصوصی سفیر پاکستان احمد فاروق نے اپنے خطاب میں پاکستانی مسیحی برادری کو کرسمس کی مبارکباد دی اور کہا کہ کرسمس امن، محبت، برداشت اور بھائی چارے کا پیغام دیتا ہے۔ انہوں نے کہا کہ پاکستانی قوم تمام مذاہب کے ماننے والوں کے لیے احترام اور رواداری کی روشن مثال ہے، اور سفارتخانۂ پاکستان ریاض بیرونِ ملک مقیم تمام پاکستانیوں کو بلا تفریق ہر ممکن تعاون فراہم کرتا رہے گا۔
تقریب میں پاکستانی کمیونٹی کی معروف شخصیات، سماجی کارکنان اور سفارتخانے کے افسران نے بھی شرکت کی۔ اس موقع پر کرسچن کمیونٹی کے بچوں نے مہمانوں کا پرتپاک استقبال کیا اور پھولوں کے گلدستے پیش کیے۔
تقریب کے اختتام پر کرسمس کا کیک کاٹا گیا اور خوشی و مسرت کا اظہار کیا گیا۔
