ریاض:-اوورسیز کنسٹرکشن کمپنی کی جانب سے سعودی عرب کے دارالحکومت ریاض میں مقیم پاکستانی صحافیوں کے اعزاز میں ایک باوقار اور تعارفی تقریب کا انعقاد کیا گیا۔ اس تقریب کا مقصد صحافی برادری کی پیشہ ورانہ خدمات کو خراجِ تحسین پیش کرنے کے ساتھ ساتھ میڈیا کے ساتھ روابط کو مزید مستحکم بنانا اور آئندہ برسوں، بالخصوص 2025 اور 2026 میں متوقع سماجی، فلاحی اور کمیونٹی سرگرمیوں کے حوالے سے آگاہی فراہم کرنا تھا۔
تقریب کی میزبانی اوورسیز کنسٹرکشن کمپنی کے چیف ایگزیکٹو آفیسر رانا عبدالرؤف نے کی۔ اس موقع پر مجلس پاکستان کے سرپرستِ اعلیٰ سید ثاقب زبیر، جنرل سیکرٹری رانا عمر فاروق، نائب صدر رانا سرفراز اور بزنس فورم کے جنرل سیکرٹری ظفر جاوید نے خصوصی شرکت کی، جبکہ یوتھ فورم کی نمائندگی صدر ابراہیم جٹ اور جنرل سیکرٹری توصیف احمد نے کی۔
تقریب سے خطاب کرتے ہوئے سرپرستِ اعلیٰ مجلسِ پاکستان سید ثاقب زبیر نے کہا کہ ریاض میں مقیم پاکستانی صحافی نہ صرف کمیونٹی کی آواز کو عالمی سطح پر مؤثر انداز میں اجاگر کر رہے ہیں بلکہ پاکستان اور سعودی عرب کے باہمی تعلقات کو مضبوط بنانے میں بھی اہم کردار ادا کر رہے ہیں۔ انہوں نے کہا کہ صحافت ایک مقدس امانت اور سماجی ذمہ داری ہے۔
صدر مجلسِ پاکستان رانا عبدالرؤف نے کہا کہ پاکستانی میڈیا ورکرز کمیونٹی کے مسائل اور مثبت سرگرمیوں کو دیانت داری سے اجاگر کر رہے ہیں، جو قابلِ تحسین ہے۔ میڈیا ایک مضبوط اور مثبت بیانیہ تشکیل دینے میں کلیدی کردار ادا کرتا ہے۔
جنرل سیکرٹری رانا عمر فاروق نے کہا کہ میڈیا کسی بھی معاشرے کی آنکھ اور زبان ہوتا ہے اور اوورسیز کمیونٹی کے مسائل اجاگر کرنے میں صحافیوں کا کردار ناقابلِ فراموش ہے۔
تقریب میں ریاض میں مقیم ممتاز پاکستانی صحافیوں کی بڑی تعداد نے شرکت کی جن میں ادریس احمد گنجہ، کامران اشرف، رانا عظیم، حسیب گوندل، عمران اعوان، وقار نسیم وامق، اجمل منہاس، کامران حسانی، وسیم خان، شہریار نفاست، جہانزیب امجد، راجا نوید کشمیری اور ملک عرفان شامل تھے۔
آخر میں صحافیوں کی خدمات کو سراہتے ہوئے مستقبل میں بھی مثبت صحافت، کمیونٹی فلاح اور پاکستان کے روشن تشخص کے فروغ کے عزم کا اظہار کیا گیا۔ تقریب خوشگوار ماحول میں اختتام پذیر ہوئی۔
