ریاض, سعودی عرب میں ماس ہولڈنگ گروپ اور ونڈ میسن کی جانب سے ایک شاندار اور باوقار افطار ڈنر کا انعقاد کیا گیا، جس میں پاکستان اور سعودی عرب کی ممتاز کاروباری شخصیات نے بڑی تعداد میں شرکت کی۔
اس پروقار تقریب میں معروف بزنس مین، بزنس کمیونٹی کے معزز اراکین، مختلف کمپنیوں کے CEOs، جنرل مینیجرز (GMs) اور انجینئرز نے شرکت کی، جبکہ سعودی عرب کے مختلف شعبہ ہائے زندگی سے تعلق رکھنے والی نمایاں شخصیات بھی اس موقع پر موجود تھیں۔ تقریب کا بنیادی مقصد کاروباری روابط کو فروغ دینا اور پاک-سعودی تعلقات کو مزید مستحکم بنانا تھا۔
افطار ڈنر کے دوران شرکاء نے پاکستان اور سعودی عرب کے درمیان مضبوط معاشی اور تجارتی تعلقات پر تفصیلی تبادلۂ خیال کیا۔ افطار کے بعد کاروباری امور پر بامقصد گفتگو ہوئی، جس میں نئے مواقع، سرمایہ کاری کے امکانات اور ممکنہ پارٹنرشپس پر غور کیا گیا۔ خوشگوار اور دوستانہ ماحول میں نیٹ ورکنگ سیشن نے شرکاء کو ایک دوسرے کے ساتھ قریبی روابط قائم کرنے کا بہترین موقع فراہم کیا، جس نے اس شام کو یادگار بنا دیا۔
ماس ہولڈنگ گروپ کے چیئرمین شیخ عبدالعزیز الحماد اور ونڈ میسن کے شریک بانی شکیل احمد کیانی نے اپنے خیالات کا اظہار کرتے ہوئے کہا کہ اس نوعیت کی تقریبات دونوں برادر ممالک کے درمیان کاروباری تعاون، سرمایہ کاری اور سماجی روابط کو مزید فروغ دینے میں اہم کردار ادا کرتی ہیں۔
تقریب کے اختتام پر مہمانوں نے بہترین انتظامات اور کامیاب انعقاد پر منتظمین کو خراجِ تحسین پیش کیا اور مستقبل میں اس نوعیت کی مزید مشترکہ تقریبات کے انعقاد کی امید ظاہر کی۔
