ریاض: پاکستان انٹرنیشنل سکول انگلش سیکشن ریاض کے آڈیٹوریم میں سالانہ مقابلۂ حسنِ قرأت 2025-26 نہایت روحانیت، وقار اور علمی و دینی ماحول کے ساتھ منعقد ہوا۔ یہ تقریب محض ایک مقابلہ نہیں بلکہ روحانی بیداری، سکون و طمانیت اور قرآنی تعلیمات سے وابستگی کا خوبصورت مظہر ثابت ہوئی۔
تقریب میں بانی و مدیرِ اعلیٰ دارالسلام انٹرنیشنل مولانا عبدالمالک مجاہد اور کنگ سعود یونیورسٹی کے ایسوسی ایٹ پروفیسر و سربراہ اکیڈمک کمیٹی ڈاکٹر اویس محمود نے بطور مہمانانِ خصوصی شرکت کی۔ اس موقع پر سکول کے پرنسپل جناب محمد تنویر، ونگ ہیڈ مارننگ شفٹ جناب ندیم اقبال اعوان اور ونگ ہیڈ ایوننگ شفٹ جناب محمد ساجد خان بھی موجود تھے۔
تقریب کا آغاز تلاوتِ کلامِ پاک سے ہوا۔ جماعت پنجم سے اے۔ٹو تک کے طلباء نے خوش الحانی، اعتماد اور اعلیٰ معیارِ قرأت کے ساتھ شرکت کی، جس نے حاضرین کو روحانیت سے معطر کر دیا۔
سر عمر فاروق کیلانی نے قرآنِ مجید پر ایک دلنشین نظم پیش کی، جبکہ سر نعمان قریشی نے قرآنِ کریم کی تعلیمات کو سمجھنے اور ان پر عمل کی اہمیت اجاگر کی۔ سر عبد الرحیم اقبال نے ماہِ رمضان کی روحانی برکات اپنانے پر زور دیا۔
ونگ ہیڈز جناب ندیم اقبال اعوان اور جناب محمد ساجد خان نے مہمانانِ خصوصی کا شکریہ ادا کرتے ہوئے منتظمین حافظ اظہر الدین بدر اور حافظ ابوعبیدہ کی خدمات کو سراہا۔ شعبۂ قرآن کے اساتذہ اور طلباء کے نظم و ضبط، لگن اور عقیدت کو بھرپور خراجِ تحسین پیش کیا گیا۔
مولانا عبدالمالک مجاہد نے اپنے خطاب میں فرمایا کہ قرآن انسان کو سیدھی راہ دکھاتا ہے اور کامیابی کے لیے قرآن سے مضبوط تعلق ناگزیر ہے۔ ڈاکٹر اویس محمود نے کہا کہ قرآنی تعلیمات نوجوان نسل میں اخلاقی کردار اور روحانی شعور کو فروغ دیتی ہیں۔
تقریب کے اختتام پر نمایاں پوزیشن حاصل کرنے والے طلباء میں انعامات، اسناد اور تحائف تقسیم کیے گئے جبکہ پرنسپل محمد تنویر نے مہمانانِ خصوصی اور منصفین کو یادگاری شیلڈز پیش کیں۔ تقریب کا اختتام خصوصی دعا کے ساتھ ہوا۔
